جڑواں شہروں اسلام آباد اور راولپنڈی میں تیز بارش کے بعد تمام متعلقہ اداروں کو ہائی الرٹ کر دیا گیا ہے جبکہ راولپنڈی انتظامیہ نے شہر میں باقاعدہ رین ایمرجنسی نافذ کر دی ہے۔
محکمہ موسمیات کے مطابق اسلام آباد کے علاقے سیدپور اور پی ایم ڈی میں 43،43 ملی میٹر، نیو کٹاریاں میں 12، گولڑہ میں 5، پیرودھائی میں 4 اور شمس آباد میں 2 ملی میٹر بارش ریکارڈ کی گئی ہے۔
یہ بھی پڑھیے اسلام آباد، راولپنڈی میں موسلا دھار بارش، شہریوں کو غیر ضروری سفر سے روک دیا گیا
ڈپٹی کمشنر راولپنڈی کی جانب سے جاری کردہ ہدایات میں تمام امدادی اور خدماتی اداروں کو چست رہنے کا حکم دیا گیا ہے۔ واسا حکام کا کہنا ہے کہ نالہ لئی میں پانی کی سطح پر مسلسل نظر رکھی جا رہی ہے، جہاں اس وقت کٹاریاں کے مقام پر پانی کا بہاؤ 5 فٹ اور گوالمنڈی میں 3 فٹ ریکارڈ کیا گیا ہے۔ کسی بھی ممکنہ صورتحال سے نمٹنے کے لیے نشیبی علاقوں میں پاکنگ عملہ ہیوی مشینری کے ساتھ تعینات ہے۔
واضح رہے کہ گزشتہ روز (منگل) بھی راولپنڈی میں 230 ملی میٹر کی شدید ترین بارش کی وجہ سے سڑکیں اور گلیاں ندی نالوں کا منظر پیش کر رہی تھیں، جس کے نتیجے میں کئی گاڑیاں پانی میں ڈوب گئیں اور پانی لوگوں کے گھروں میں داخل ہو گیا۔ بارش اور طوفان کے باعث راولپنڈی میں کرنٹ لگنے اور اسلام آباد میں چھت گرنے کے حادثات میں 2 افراد جاں بحق بھی ہوئے تھے۔
