وزیراعظم شہباز شریف نے مکہ مکرمہ کے مقدس مقام کے خلاف ڈرون حملے کی کوشش کی شدید ترین الفاظ میں مذمت کرتے ہوئے سعودی عرب کی خودمختاری، علاقائی سالمیت اور حرمین شریفین کے تحفظ کے لیے مکمل یکجہتی کا اظہار کیا ہے۔
وزیراعظم شہباز شریف نے ایکس پر جاری بیان میں کہا کہ مکہ مکرمہ کے مقدس مقام کے خلاف بزدلانہ اور گھناؤنے ڈرون حملے کی کوشش کی وہ سخت ترین الفاظ میں مذمت کرتے ہیں۔ انہوں نے کہا کہ پاکستانی عوام اس اشتعال انگیز اقدام پر غم زدہ اور مضطرب ہیں، جبکہ اس قابل مذمت اور ناقابل معافی کارروائی پر محسوس کیے جانے والے دکھ اور صدمے کی گہرائی بیان کرنے کے لیے الفاظ ناکافی ہیں۔
I condemn in the strongest possible terms the dastardly and heinous attempted drone attack against the Holy Site of Makkah Al-Mukarramah.
The people of Pakistan are saddened and perturbed by this outrageous act. There can be no words strong enough to capture the depth of…
— Shehbaz Sharif (@CMShehbaz) September 16, 2026
وزیراعظم نے سعودی شاہی مسلح افواج کی غیر معمولی چوکسی، بہادری اور پیشہ ورانہ صلاحیت کو خراج تحسین پیش کرتے ہوئے ان کی بروقت اور بہادرانہ کارروائی کو سراہا۔
شہباز شریف نے ایک بار پھر تمام فریقین پر زور دیا کہ وہ زیادہ سے زیادہ تحمل کا مظاہرہ کریں اور مزید کشیدگی کے دہانے سے پیچھے ہٹیں۔ انہوں نے کہا کہ خطہ پہلے ہی تنازعات کی وجہ سے بہت زیادہ نقصان اٹھا چکا ہے، جبکہ پائیدار امن کے لیے مذاکرات اور سفارت کاری ہی واحد راستہ ہیں۔
یہ بھی پڑھیں:حوثی ڈرون مکہ مکرمہ کی حدود میں داخل ہونے سے پہلے تباہ
وزیراعظم نے کہا کہ پاکستان سعودی عرب کی خودمختاری اور علاقائی سالمیت کے دفاع کے ساتھ ساتھ حرمین شریفین کے تحفظ اور تقدس کے لیے برادر ملک کے شانہ بشانہ غیر متزلزل طور پر کھڑا ہے، اور یہ ایسا فریضہ ہے جسے ہر پاکستانی اپنے دل کے قریب سمجھتا ہے۔
