واٹس ایپ نے صارفین کی ایک عام مشکل آسان کرنے کی تیاری کرلی، اب کئی ماہ یا برس پرانے پیغامات تک پہنچنے کے لیے چیٹ میں طویل اسکرولنگ کی ضرورت پیش نہیں آئے گی۔
رپورٹ کے مطابق واٹس ایپ کے آئی او ایس کے نئے بیٹا ورژن میں چیٹس کے اندر براہ راست سرچ کرنے کے لیے نیا شارٹ کٹ متعارف کرایا گیا ہے۔
یہ بھی پڑھیں: واٹس ایپ کی ’رسٹرکٹڈ چیٹ‘، نئے فیچر کی تفصیلات سامنے آگئیں
فی الحال کسی چیٹ میں موجود پرانا پیغام تلاش کرنے کے لیے صارف کو چیٹ سے نکل کر چیٹ کی معلومات والے حصے میں جانا پڑتا ہے، جہاں سرچ کا آپشن استعمال کیا جاتا ہے۔
نئے فیچر کے تحت چیٹ اسکرین ہی پر سرچ کا بٹن دستیاب ہوگا، تاہم یہ بٹن ہر وقت نظر نہیں آئے گا۔ صارف جب چیٹ میں اوپر کی جانب جا کر پرانے پیغامات دیکھنے کے لیے اسکرول کرے گا تو سرچ کا بٹن ظاہر ہوجائے گا۔
اس تبدیلی کے ذریعے مطلوبہ پرانے پیغام تک رسائی کا عمل مختصر ہوجائے گا اور صارف کو طویل عرصے تک پیغامات اسکرول کرنے کی زحمت نہیں اٹھانا پڑے گی۔
یہ بھی پڑھیں: واٹس ایپ میں حساس چیٹس کو محفوظ رکھنے کے لیے نیا سیکیورٹی فیچر متعارف
یہ سہولت صرف چیٹس تک محدود نہیں رہے گی بلکہ واٹس ایپ چینلز میں بھی متعارف کرانے پر کام جاری ہے، جہاں صارفین کسی چینل کی پرانی پوسٹس یا اپ ڈیٹس تلاش کرسکیں گے۔
فی الحال یہ فیچر آزمائشی مرحلے میں ہے اور آئی او ایس کے بیٹا ورژن میں نظر آیا ہے، اس لیے عام صارفین کے لیے اس کی دستیابی کی حتمی تاریخ سامنے نہیں آئی۔
