کینیا کے دارالحکومت نیروبی میں ورلڈ ہیلتھ ایکسپو 2026 کے موقع پر پاکستانی ہائی کمیشن نے پاکستان پویلین کا افتتاح کردیا، جہاں پاکستانی ادویات، طبی آلات اور صحت کے شعبے سے وابستہ کمپنیوں نے شرکت کی۔
پاکستانی ہائی کمیشن کے مطابق ہائی کمیشن کے ٹریڈ ونگ نے ٹریڈ ڈویلپمنٹ اتھارٹی آف پاکستان (ٹی ڈی اے پی) کے تعاون سے 9 پاکستانی کمپنیوں کی ایکسپو میں شرکت کو یقینی بنایا ہے۔
The High Commission of Pakistan proudly inaugurated the "Pakistan pavilion" in World Health Expo (WHX) Nairobi, 2026". The Trade Wing of the High Commission, in collaboration with TDAP, facilitated participation of 09 Pakistani companies dealing in different sectors
🇰🇪🇵🇰 pic.twitter.com/Eh00ppcEn0— Pakistan High Commission Kenya (@PakinKenya) September 16, 2026
ان کمپنیوں کا تعلق ادویات، جراحی کے آلات، طبی خدمات اور صحت و تندرستی کے شعبوں سے ہے۔ پاکستان پویلین میں شریک کمپنیوں کو اپنی مصنوعات اور خدمات عالمی خریداروں اور کاروباری نمائندوں کے سامنے پیش کرنے کا موقع مل رہا ہے۔
ہائی کمیشن کا ٹریڈ ونگ شریک پاکستانی کمپنیوں کے لیے کاروباری اداروں کے درمیان ملاقاتوں کا بھی انتظام کررہا ہے تاکہ انہیں کینیا اور دیگر ممالک کی کمپنیوں کے ساتھ تجارتی روابط قائم کرنے میں مدد مل سکے۔
پاکستانی ہائی کمیشن کے مطابق پاکستانی کمپنیوں کو کینیا کے فارمیسی اینڈ پوائزنز بورڈ میں رجسٹریشن کے عمل میں بھی معاونت فراہم کی جارہی ہے، جس کا مقصد پاکستانی مصنوعات کے لیے کینیا کی مارکیٹ تک رسائی آسان بنانا ہے۔
یہ بھی پڑھیں:پاک فارما ایکسپو: ڈریپ کی مکمل ڈیجیٹلائزیشن، ادویات پر بارکوڈ کا اعلان
ہائی کمیشن نے کہا ہے کہ ورلڈ ہیلتھ ایکسپو میں پاکستانی کمپنیوں کی شرکت سے پاکستان اور کینیا کے درمیان تجارت، کاروبار اور صحت کے شعبے میں تعاون کو فروغ دینے میں مدد ملے گی۔
