کوہاٹ پولیس لائنز کی جامع مسجد میں نماز جمعہ کے دوران ہونے والے لرزہ خیز خودکش دھماکے کی تحقیقات میں بڑی پیشرفت ہوئی ہے۔
سیکیورٹی ذرائع کے مطابق واقعے میں ملوث ایک خودکش بمبار کی شناخت افغان شہری مطیع اللہ کے نام سے ہو گئی ہے، جبکہ دوسرے دہشتگرد کی شناخت کا عمل تیزی سے جاری ہے۔
یاد رہے کہ گزشتہ روز کوہاٹ پولیس لائنز مسجد میں اس وقت خودکش حملہ کیا گیا تھا جب پولیس اہلکاروں سمیت دیگر نمازی نماز جمعہ کی ادائیگی میں مصروف تھے۔ دلخراش واقعے میں 22 افراد شہید اور 100 سے زائد شدید زخمی ہو گئے تھے۔
صدر مملکت آصف علی زرداری، وزیراعظم شہباز شریف، وزیراعلیٰ خیبر پختونخوا سہیل آفریدی اور گورنر خیبر پختونخوا نے اس بزدلانہ دہشتگردانہ حملے کی سخت ترین الفاظ میں مذمت کی ہے۔
اعلیٰ حکام نے شہداء کے درجات کی بلندی اور زخمیوں کی جلد صحتیابی کی دعا کرتے ہوئے سیکیورٹی اداروں کو واقعے میں ملوث نیٹ ورک کے خلاف فوری اور فیصلہ کن کارروائی کی ہدایت کی ہے۔
