پی آئی اے نے اعلان کیا ہے کہ بیڑے میں نئے طیارے شامل ہوتے ہی مالدیپ کے لیے براہِ راست پروازیں شروع کی جائیں گی۔
پی آئی اے کے چیف ایگزیکٹو آفیسر ایئر وائس مارشل محمد عامر حیات نے کہا ہے کہ پاکستان اور مالدیپ کے درمیان فضائی رابطے سے سیاحت، تجارت اور عوامی روابط کو فروغ ملے گا۔
پی آئی اے کے مطابق ایئر وائس مارشل محمد عامر حیات نے بدھ کو ایئرلائن کے ہیڈ آفس میں مالدیپ کی پارلیمنٹ کے اسپیکر عبدالرعیم عبداللہ کی سربراہی میں آنے والے اعلیٰ سطح کے وفد سے ملاقات کے دوران گفتگو کی۔
یہ بھی پڑھیں: مالدیپ کی امریکا ایران کشیدگی کم کرانے کے لیے پاکستان کے کردار کی تعریف
پی آئی اے کے بیان کے مطابق محمد عامر حیات نے کہا کہ جیسے ہی نئے طیارے پی آئی اے کے بیڑے میں شامل ہوں گے، مالدیپ کے لیے براہِ راست پروازیں شروع کر دی جائیں گی۔
مالدیپی وفد پاکستان کے سرکاری مہمان کی حیثیت سے دورہ کر رہا ہے، وفد میں مالدیپ کے ہائی کمشنر، سیکنڈ سیکریٹری، ڈپٹی لیڈر اور دیگر اعلیٰ حکام شامل ہیں۔
ملاقات کے دوران پاکستان اور مالدیپ کے درمیان براہِ راست فضائی آپریشن شروع کرنے پر تبادلہ خیال کیا گیا۔
مزید پڑھیں: مالدیپ کا اسموکنگ فری ملک بننے کا کارگر منصوبہ کیا ہے؟
پی آئی اے کے مطابق براہِ راست پروازوں کے آغاز سے دونوں ممالک کے درمیان سیاحت، تجارت اور عوامی روابط کو فروغ ملنے کی توقع ہے۔
مالدیپ کی پارلیمنٹ کے اسپیکر عبدالرعیم عبداللہ نے کہا کہ بہتر فضائی رابطوں سے دونوں ممالک کے درمیان باہمی تجارت، سیاحت اور عوامی روابط میں نمایاں پیش رفت ہوگی۔
انہوں نے کہا کہ پاکستان اور مالدیپ کے درمیان براہِ راست پروازوں کا آغاز دونوں ممالک کے درمیان برادرانہ تعلقات کو مزید مضبوط کرے گا۔
While Boeing will provide a revised proposal for aircraft acquisition, PIA explores leasing option for fleet expansion
Pakistan’s Federal Minister for Finance and Revenue met Boeing Global President Dr. Brendan Nelson during his visit to attend the 81st Session of the United… pic.twitter.com/qb1fpZyKsO
— FL360aero (@fl360aero) September 23, 2026
پی آئی اے اپنے فضائی بیڑے کو وسعت دینے اور جدید بنانے کے لیے اقدامات کر رہی ہے۔
اس سلسلے میں وفاقی وزیر خزانہ محمد اورنگزیب نے اس سے قبل بوئنگ گلوبل کے صدر ڈاکٹر برینڈن نیلسن سے ملاقات میں پی آئی اے کے بیڑے کی جدید کاری پر بھی تبادلہ خیال کیا تھا۔
ملاقات میں وزیر خزانہ نے نئے طیاروں کے حصول کے لیے نظرثانی شدہ تجویز پی آئی اے کو فراہم کرنے کی بوئنگ کی یقین دہانی کا خیرمقدم کیا۔
مزید پڑھیں: پاکستان مالدیپ کے ساتھ مختلف شعبوں میں تعاون بڑھانے کے لیے پرعزم ہے، شہباز شریف
اس کے علاوہ طیاروں کی جلد فراہمی کے امکانات اور عبوری طور پر طیارے لیز پر لینے کے انتظامات کا بھی جائزہ لینے پر اتفاق کیا گیا۔
محمد اورنگزیب نے پی آئی اے کی نجکاری اور بڑے ہوائی اڈوں کے انتظامی امور آؤٹ سورس کرنے کے منصوبوں پر بھی روشنی ڈالی۔
انہوں نے ایوی ایشن سیفٹی کی استعداد کار، ریگولیٹری روابط اور امریکا کے لیے براہِ راست پروازوں کی بحالی کے سلسلے میں بوئنگ کے تعاون کو سراہا اور پاکستان میں ہوا بازی کے شعبے میں طویل مدتی ترقی کے امکانات کو اجاگر کیا۔
