قومی اسمبلی کے اجلاس میں کسی بھی ممبر اسمبلی کی نااہلی کی زیادہ سے زیادہ مدت 5 سال تک کرنے کا بل اتفاق رائے سے منظور کر لیا گیا ہے۔
قومی اسمبلی سے اس بل کی منظوری کے بعد قائد ن لیگ نواز شریف اور استحکام پاکستان پارٹی (آئی پی پی) کے سربراہ جہانگیر خان ترین کے انتخاب لڑنے کا راستہ بھی ہموار ہو گیا ہے۔
مزید پڑھیں
اتوار کو اسپیکر راجہ پرویز اشرف کی زیر صدارت ہونے والے اجلاس میں نا اہلی کی زیادہ سے زیادہ مدت کے تعین کا بل اتفاق رائے سے منظور کیا گیا۔
اس کے علاوہ ایوان نے انتخابات کی تاریخ دینے کا اختیار الیکشن کمیشن آف پاکستان کو دینے کا بل بھی منظور کر لیا ہے۔
واضح رہے کہ کسی بھی رکن اسمبلی کی نااہلی کی مدت 5 سال کرنے کا بل ایوان بالا (سینیٹ) سے پہلے ہی منظور ہو چکا ہے۔
یہ بھی یاد رہے کہ اس سے قبل آرٹیکل 62 اور 63 کے تحت نااہلی کو تاحیات تصور کیا جاتا تھا اور سابق وزیرِ اعظم نواز شریف اور پی ٹی آئی کے سابق رہنما جہانگیر ترین کو سنہ 2017 میں آرٹیکل 62 ون ایف کے تحت ہی تاحیات نااہلی کا سامنا کرنا پڑا تھا۔
