وفاقی وزیر اطلاعات و نشریات عطااللہ تارڑ نے کہا ہے کہ خیبرپختونخوا کی سابق صوبائی حکومت دہشتگردوں کی سہولت کاری میں ملوث تھی، جس کے ناقابل تردید شواہد سامنے لائے جائیں گے۔ صوبے میں ایک انتہائی قابل نیا انتظامی سیٹ اپ آچکا ہے اور ان کے خیال میں مذاکرات کے ایجنڈے میں سابق صوبائی حکومت کی بحالی شامل نہیں ہے۔
نجی ٹی وی سے گفتگو کرتے ہوئے عطااللہ تارڑ نے کہاکہ خیبرپختونخوا میں نئی انتظامیہ کے قیام کے بعد صوبائی ایڈوائزری کونسل کو اختیار حاصل ہے کہ وہ مختلف معاملات کو کس طرح آگے بڑھاتی ہے۔
مزید پڑھیں: مذاکرات کے دروازے بند، پی ٹی آئی مکمل سیاسی تنہائی کا شکار ہو گئی؟
وفاقی وزیر اطلاعات نے کہاکہ قومی احتساب بیورو (نیب) نے کوہستان اسکینڈل کی تحقیقات انتہائی مہارت سے کیں، جس کے نتیجے میں اربوں روپے کی کرپشن بے نقاب ہوئی۔
انہوں نے کہاکہ صوبائی ایڈوائزری کونسل کے پاس اختیار موجود ہے کہ وہ ان مقدمات اور معاملات کو کس طرح آگے لے کر چلتی ہے۔
عطااللہ تارڑ نے کہاکہ مراد سعید کی انصاف اسٹوڈنٹس فیڈریشن (آئی ایس ایف) کی ٹیم میں سہیل آفریدی، مینا خان، شفیع جان اور شاہد خٹک شامل تھے۔
انہوں نے کہاکہ مراد سعید کی ٹیم کا غیر ذمہ دارانہ رویہ کھل کر سامنے آچکا ہے اور یہ لوگ بری طرح بے نقاب ہوگئے ہیں۔
وفاقی وزیر نے کہاکہ تحریک انصاف کی قیادت دعوے کرتی رہی کہ لاکھوں افراد سڑکوں پر نکلیں گے، لیکن خیبر میں چند لوگوں کے سوا کوئی باہر نہیں نکلا۔
انہوں نے دعویٰ کیاکہ خیبرپختونخوا کے عوام نے سابق صوبائی حکومت سے نجات ملنے پر خوشی کا اظہار کیا ہے۔
عطااللہ تارڑ نے کہاکہ تحریک انصاف نے پہلے 27 ستمبر اور پھر 4 اکتوبر کی تاریخ دی، لیکن حقیقت یہ تھی کہ ان کے پاس لانگ مارچ کے لیے مطلوبہ تعداد میں لوگ ہی موجود نہیں تھے۔
انہوں نے کہاکہ تحریک انصاف کے پاس نہ سڑکوں پر عوام کو متحرک کرنے کی طاقت تھی اور نہ ہی دہشتگردی کے خاتمے کے لیے کوئی واضح لائحہ عمل موجود تھا۔
وفاقی وزیر اطلاعات کے مطابق تحریک انصاف کے رہنماؤں سے مذاکرات کیے گئے تھے اور وہ بات چیت کے دوران معاملات پر رضامند بھی ہوگئے تھے۔
انہوں نے کہاکہ اگر مذاکرات کامیاب ہوجاتے تو وہ سب سے پہلے کھڑے ہوکر اس کامیابی پر مبارکباد دیتے۔
عطااللہ تارڑ نے کہاکہ انہیں نہیں لگتا کہ موجودہ بات چیت میں خیبرپختونخوا کی سابق صوبائی حکومت کی بحالی کا معاملہ شامل ہے۔
ان کا کہنا تھا کہ مذاکرات صوبائی حکومت کی واپسی کے لیے نہیں ہورہے، کیونکہ اب یہ مرحلہ گزر چکا ہے اور ٹرین اسٹیشن چھوڑ چکی ہے۔
انہوں نے کہاکہ تحریک انصاف کے رہنما زیادہ تر عمران خان کو حاصل مراعات کے معاملے پر بات کرتے رہے ہیں۔
وفاقی وزیر اطلاعات کے مطابق تحریک انصاف کے بعض رہنما حکومتی شخصیات سے غیر رسمی رابطے اور بات چیت بھی کررہے ہیں۔
انہوں نے کہاکہ وزیراعظم شہباز شریف متعدد مرتبہ تحریک انصاف کو مذاکرات کی پیشکش کرچکے ہیں۔
عطااللہ تارڑ کا کہنا تھا کہ تحریک انصاف کے رہنما مذاکرات سے بہت خوش تھے، تاہم سہیل آفریدی کی وجہ سے انہیں سبکی کا سامنا کرنا پڑا۔
مزید پڑھیں: خیبرپختونخوا میں اب پروپیگنڈے کے بجائے عملی اقدامات کیے جائیں گے، ثمر ہارون بلور
وفاقی وزیر اطلاعات نے عمران خان کو جیل میں فراہم کی جانے والی سہولیات سے متعلق کہاکہ انہیں اپنی مرضی کا کھانا دیا جاتا ہے اور ورزش کے لیے مشینیں بھی ان کے پاس موجود ہیں۔
عطااللہ تارڑ نے ایک بار پھر کہاکہ خیبرپختونخوا میں ایک انتہائی قابل نیا انتظامی سیٹ اپ آچکا ہے اور صوبائی ایڈوائزری کونسل کو اختیار حاصل ہے کہ وہ متعلقہ معاملات اور مقدمات کو کس انداز میں آگے بڑھاتی ہے۔
