مصنوعی ذہانت کے معروف نظام کلاڈ (Claude) کی خالق کمپنی انتھروپک نے اعلیٰ تنخواہ پر انسانی مصنف کی بھرتی کے لیے آسامی مشتہر کردی۔ کمپنی اس عہدے کے لیے سالانہ 2 کروڑ 78 لاکھ سے 3 کروڑ 25 لاکھ روپے تک تنخواہ دینے کو تیار ہے۔
مزید پڑھیں:ڈونلڈ ٹرمپ ایک اور معاہدے کے لیے پرامید، ٹیک کمپنی انتھروپک سیکیورٹی رسک کے بجائے مفید قرار
کمپنی کو سان فرانسسکو میں ایگزیکٹو کمیونیکیشنز رائٹر درکار ہے، جس کی ذمہ داری کمپنی کے اعلیٰ عہدیداروں کی تقاریر، اہم اعلانات اور دیگر تحریری مواد تیار کرنا اور اس کی تدوین کرنا ہوگی۔
امیدوار کے لیے کم از کم 8 سال کا اعلیٰ سطح کا پیشہ ورانہ تجربہ ضروری قرار دیا گیا ہے۔ منتخب مصنف کو مصنوعی ذہانت سے متعلق پیچیدہ تکنیکی موضوعات کو سمجھ کر عام اور مخصوص قارئین کے لیے مؤثر انداز میں پیش کرنا ہوگا۔
اس کے علاوہ اہم تقریبات کی تیاری، اچانک سامنے آنے والی خبروں پر کمپنی کا مؤقف مرتب کرنے اور اعلیٰ انتظامی عہدیداروں کے ساتھ مل کر ابلاغی حکمت عملی وضع کرنے کی ذمہ داریاں بھی شامل ہوں گی۔
مزید پڑھیں:مصنوعی ذہانت کی دیدہ دلیری: گوگل کے ‘جیمنائی’ نے 3 کمپنیوں کو ہیک کر لیا
رپورٹ کے مطابق کمپنی ویزا اسپانسرشپ کی سہولت بھی دیتی ہے، تاہم ہر امیدوار یا عہدے کے لیے اس کی ضمانت نہیں۔ یہ آسامی ایسے وقت میں سامنے آئی ہے جب مصنوعی ذہانت تحریر سمیت متعدد شعبوں میں تیزی سے کام انجام دے رہی ہے، لیکن پیچیدہ خیالات کی ترجمانی، مؤثر ابلاغ اور حالات کے مطابق فیصلہ سازی کے لیے تجربہ کار انسانی مصنفین کی ضرورت برقرار ہے۔
