ایپل کا پہلا فولڈ ایبل فون، آئی فون ڈیو، جمعے کے روز دنیا بھر کی مارکیٹوں میں فروخت کے لیے پیش کر دیا گیا، جس کی قیمت تقریباً 2 ہزار ڈالر رکھی گئی ہے، تاہم اس کی لانچنگ پر ماضی میں نئے آئی فونز کی آمد کے موقع پر دیکھے جانے والے جوش و خروش کی نسبت کم گہما گہمی دیکھنے میں آئی۔
سنگاپور اور شنگھائی سے لے کر لندن اور سان فرانسسکو تک فون کی طلب مضبوط رہی، لیکن فروخت محدود رکھنے کے باعث ایپل اسٹورز کے باہر طویل قطاریں لگانے اور رات بھر انتظار کرنے کے وہ مناظر کم دکھائی دیے جو ماضی میں نئے آئی فون کی فروخت کے آغاز کی پہچان سمجھے جاتے تھے۔
یہ بھی پڑھیں: ایپل نے مارکیٹ ویلیو کے لحاظ سے دنیا کی سب سے بڑی کمپنی ہونے کا اعزاز این ویڈیا سے واپس چھین لیا
سام سنگ الیکٹرانکس اور ہواوے ٹیکنالوجیز جیسی حریف کمپنیاں کئی برسوں سے مہنگے فولڈ ایبل فون فروخت کر رہی ہیں، آئی فون ڈیو کی آمد اس بات کا امتحان ہے کہ آیا ایپل فولڈ ایبل موبائل فونز کی محدود مارکیٹ کو بھی اسی طرح نئی شکل دے سکتا ہے جس طرح آئی فون نے اسمارٹ فونز کی دنیا میں انقلاب برپا کیا تھا۔
یہ فون ایپل کے نئے چیف ایگزیکٹو آفیسر جان ٹرنَس کے لیے بھی ابتدائی چیلنج ہے، ہارڈویئر کے سابق سربراہ جان ٹرنَس نے ستمبر میں عہدہ سنبھالنے کے بمشکل ایک ہفتے بعد اس فون کی رونمائی کی تھی۔
Apple's first foldable phone hit stores on Friday. Lines wrapped around the front of the flagship store on Fifth Avenue in New York City as fans waited to get their hands on the iPhone Duo.
There's strong demand for the new foldable iPhone, with supplies quickly selling out… pic.twitter.com/r04fJf9DTb
— CBS News (@CBSNews) October 23, 2026
آئی فون ڈیو کی آن لائن پیشگی بکنگ ایک ہفتہ قبل شروع ہوتے ہی طلب میں غیر معمولی اضافے کے باعث اس کی متوقع ترسیل کی تاریخیں چند ہی منٹوں میں جنوری کے آخر تک پہنچ گئی تھیں۔
ایپل نے صارفین کی جانب سے ملنے والے ردعمل کو ’غیر معمولی سے بھی بڑھ کر‘ قرار دیا۔
کمپنی نے پیشگی بکنگ کے دوران فی صارف زیادہ سے زیادہ 2 فون خریدنے کی اجازت دی، جبکہ براہِ راست اسٹور پر آنے والے صارفین کے لیے فروخت بھی محدود رکھی گئی۔
مزید پڑھیں: ایپل انٹیلیجنس دسمبر میں چین میں متعارف کرائے جانے کا امکان، ٹم کک کا اعلان
چین، فرانس، ہانگ کانگ، بھارت اور جاپان میں یہ فون صرف ان صارفین کو دستیاب تھے جنہوں نے آن لائن آرڈر دیا تھا۔
سڈنی میں، جہاں جمعے کے روز ایپل کے پہلے اسٹور پر پاسپورٹ کی شکل سے مشابہ نئے فونز کی فروخت شروع ہوئی، مقامی وقت کے مطابق صبح 8 بجے اسٹور کھلنے سے پہلے ہی باہر خریداروں کی قطار لگ گئی۔
