آزاد جموں و کشمیر کے حکام کے مطابق مظفرآباد کے نواحی علاقے میں مسافر جیپ پہاڑی سڑک سے بے قابو ہوکر گہری کھائی میں جاگری، جس کے نتیجے میں ایک باپ اور اس کے 2 بیٹوں سمیت 7 افراد جاں بحق ہوگئے۔
پولیس اور انتظامیہ کے مطابق جیپ گاؤں نکہ شکر پٹیاں سے گاؤں سری درہ جا رہی تھی، گاڑی ابھی تقریباً 3 کلومیٹر ہی آگے بڑھی تھی کہ گاؤں ستھرا پوڈیمار کے قریب حادثہ پیش آگیا۔
یہ بھی پڑھیں: بونیر میں مسافر وین کو حادثہ: 6 افراد جاں بحق، 17 زخمی، تمام کا تعلق پشاور کےعلاقے ہزار خوانی سے
حکام کا کہنا ہے کہ لینڈ سلائیڈنگ سے متاثرہ سڑک کے حصے سے گزرتے ہوئے ڈرائیور گاڑی پر قابو نہ رکھ سکا، جس کے باعث جیپ پہاڑی ڈھلوان سے نیچے جاگری اور کئی مرتبہ الٹنے کے بعد رکی۔
پولیس رپورٹ کے مطابق جیپ سڑک سے تقریباً ایک ہزار سے پندرہ سو فٹ نیچے جاگری، حادثے میں گاڑی میں سوار تمام 7 افراد موقع پر ہی دم توڑ گئے۔
مظفرآباد: نکہ شکر پٹیاں جیپ حادثہ، سات افراد کی جان جانے کی اطلاعات pic.twitter.com/Kru1YG9Qpv
— Soban Iftikhar Raja (@soban_iftikhar1) October 25, 2026
ایڈیشنل ڈپٹی کمشنر مظفرآباد کے مطابق، حادثے کے مقام پر لاشیں مختلف جگہوں پر بکھری ہوئی تھیں، بعدازاں مقامی افراد اور امدادی اہلکاروں نے لاشیں نکالیں۔
پولیس کے مطابق لاشیں ضروری کارروائی کے بعد تدفین کے لیے لواحقین کے حوالے کردی گئیں۔
مری حادثے میں 2 خواتین اور 5 بچے جاں بحق
دوسرے حادثے میں مری کے علاقے چوکی ٹریٹ میں بروہا چوک کے قریب مسافروں سے بھری سوزوکی وین سڑک سے پھسل کر گہری کھائی میں جاگری، جس کے بعد گاڑی میں آگ لگ گئی۔ حادثے میں 2 خواتین اور 5 بچے جاں بحق ہوگئے۔
پولیس کے مطابق جاں بحق ہونے والوں میں الماس زوجہ تنویر اور ان کی 3 بیٹیاں، جبکہ شاہینہ زوجہ ممتاز اور ان کی 2 بیٹیاں شامل ہیں، تمام متاثرین کا تعلق مری کے گاؤں ڈھلہ سے ایک ہی خاندان سے تھا۔
https://Twitter.com/sumair_shah123/status/2114377714493002081
ڈسٹرکٹ پولیس کے مطابق خاندان ایبٹ آباد میں شادی کی تقریب میں شرکت کے بعد اپنے گاؤں واپس جا رہا تھا کہ راستے میں یہ افسوس ناک حادثہ پیش آگیا۔
حادثے میں زخمی ہونے والے افراد کو علاج کے لیے راولپنڈی کے ہولی فیملی اسپتال منتقل کردیا گیا، زخمیوں کی شناخت ارشد، نگہت، لائبہ، کاشان، ایما نور، طیب محمود اور رائمہ نور کے ناموں سے ہوئی ہے۔
