چین کی کمیونسٹ پارٹی کے بین الاقوامی شعبے (آئی ڈی سی پی سی) کے وزیر لیو ہائی سنگھ پاکستان کے 3 روزہ سرکاری دورے پر اتوار کو اسلام آباد پہنچ گئے ہیں۔
دفترِ خارجہ کے جاری کردہ بیان کے مطابق سینیٹر انوشہ رحمان خان اور وزارتِ خارجہ کے ایڈیشنل سیکریٹری برائے ایشیا پیسیفک ڈاکٹر محمد فیصل نے ایئرپورٹ پر چینی وزیر کا پرتپاک استقبال کیا۔ چینی وزیر یہ دورہ پاکستان کے نائب وزیراعظم اور وزیرِ خارجہ اسحاق ڈار کی خصوصی دعوت پر کر رہے ہیں۔
اعلیٰ قیادت سے ملاقاتیں اور مشترکہ اجلاس
دفترِ خارجہ کی جانب سے جاری بیان میں بتایا گیا ہے کہ آئی ڈی سی پی سی کے وزیر اپنے قیام کے دوران پاکستان کی اعلیٰ سیاسی و عسکری قیادت سے ملاقاتیں کریں گے اور 2 نومبر 2026 کو اسلام آباد میں نائب وزیراعظم و وزیرِ خارجہ اسحاق ڈار کے ہمراہ ایک اعلیٰ سطح کی تقریب کی مشترکہ صدارت بھی کریں گے۔
At the invitation of the Deputy Prime Minister/Foreign Minister SenatorMohammadIshaqDar @MIshaqDar50 , Mr. Liu Haixing, Minister of the International Department of the CPC Central Committee (IDCPC), arrived in Islamabad on a three-day official visit to Pakistan.
He was received by Senator Anusha Rahman Khan and Dr. Mohammad Faisal, Additional Secretary (Asia Pacific), Ministry of Foreign Affairs.
The Minister of IDCPC will call on the leadership of Pakistan and co-chair a high-level event alongside the Deputy Prime Minister/Foreign Minister in Islamabad on 2 November 2026.
This visit is a part of the ongoing high-level exchanges between Pakistan and China, reflecting the longstanding friendship and All-Weather Strategic Cooperative Partnership between the two countries.
— Ministry of Foreign Affairs – Pakistan (@ForeignOfficePk) November 1, 2026
یہ دورہ اسلام آباد اور بیجنگ کے درمیان جاری اعلیٰ سطح کے تبادلوں کا تسلسل ہے، جو دونوں ممالک کے درمیان دیرینہ دوستانہ اور ہر موسم کی اسٹریٹجک شراکت داری کا عکاس ہے۔
چینی کمیونسٹ پارٹی کے ادارے ’آئی ڈی سی پی سی‘ کا کردار
واضح رہے کہ بین الاقوامی شعبہ (آئی ڈی سی پی سی) چین کی کمیونسٹ پارٹی کی مرکزی کمیٹی کا ایک اہم اور راست ادارہ ہے۔
یہ ادارہ مختلف ممالک کی سیاسی جماعتوں اور تنظیموں کے ساتھ روابط، بین پارلیمانی و سیاسی تبادلوں کی دیکھ بھال اور چین کی خارجہ پالیسی کی معاونت کے لیے سیاسی معلومات کی فراہمی کا ذمہ دار ہے۔
پاکستان اور چین کے درمیان حکمران جماعتوں اور سیاسی قيادت کے باقاعدہ تبادلے دوطرفہ تعلقات کا اہم ترین ستون ہیں۔
سی پیک سرمایہ کاری اور نجی شعبے کی شراکت داری
پاکستان اور چین کے درمیان تجارتی و اقتصادی تعلقات بھی انتہائی مستحکم ہیں۔ چین نے چین پاکستان اقتصادی راہداری (سی پیک) کے تحت پاکستان میں سڑکوں کے نیٹ ورک، بنیادی ڈھانچے اور دیگر ترقیاتی منصوبوں میں 65 ارب ڈالر سے زیادہ کی سرمایہ کاری کا عزم ظاہر کر رکھا ہے۔
یہ بھی پڑھیں:پاک چین دوستی اسپتال کا افتتاح، ملک بھر سے آنے والے مریضوں کا مفت علاج ہوگا، وزیراعظم شہباز شریف کا اعلان
اس کے علاوہ کئی چینی نجی صنعت کاروں اور مینوفیکچررز نے بھی پاکستانی شراکت داروں کے ساتھ مشترکہ کاروباری منصوبے شروع کر رکھے ہیں۔
پی آئی اے کی برائے راست پروازوں کی بحالی اور فضائی رابطے
سفارتی دورے کے ساتھ ساتھ دونوں ممالک کے درمیان فضائی رابطوں میں بھی بڑی پیش رفت ہوئی ہے۔
پاکستان انٹرنیشنل ایئرلائنز (پی آئی اے) نے 30 اکتوبر کو پہلی پرواز کی روانگی کے ساتھ دونوں ممالک کے درمیان برائے راست پروازوں کا سلسلہ دوبارہ بحال کر دیا ہے۔
اس پیش رفت سے اسلام آباد اور بیجنگ کے درمیان براہِ راست فضائی رابطہ بحال ہو گیا ہے۔
اس بحال شدہ پروازی سروس سے تاجروں، سیاحوں، طالب علموں اور دونوں ممالک کا سفر کرنے والے عام مسافروں کو انتہائی سہولت میسر آئے گی، جبکہ اس سے عوامی روابط اور دوطرفہ سیاحتی و کاروباری تبادلوں کو مزید تقویت ملے گی۔
