چیئرمین پی ٹی آئی اور رکن قومی اسمبلی بیرسٹر گوہر خان نے پارٹی کے اندرونی معاملات، بانی پی ٹی آئی عمران خان سے ملاقاتوں اور مذاکرات سے متعلق عائد کیے گئے الزامات کو بے بنیاد، گمراہ کن اور حقائق کے منافی قرار دیتے ہوئے مسترد کر دیا ہے۔
سوشل میڈیا پلیٹ فارم ایکس پر اپنے بیان میں بیرسٹر گوہر نے کہا کہ یہ دعویٰ سراسر جھوٹ، بے بنیاد اور گمراہ کن ہے، انہوں نے کہا کہ خان صاحب سے ملاقات کے لیے ہر ممکن کوشش کی گئی، خواہ اس کے لیے عدالتی احکامات کا سہارا لیا گیا ہو، مذاکرات کیے گئے ہوں یا دیگر دستیاب ذرائع استعمال کیے گئے ہوں۔
یہ بھی پڑھیں: مذاکرات کی بھرپور کوشش کی مگر بات نہ بنی، چیئرمین پی ٹی آئی بیرسٹر گوہر کا اعتراف
تاہم ان تمام کوششوں کے باوجود انہیں بانی پی ٹی آئی سے ایک بھی ملاقات کی اجازت نہیں دی گئی۔
پی ٹی آئی چیئرمین کے مطابق مذاکراتی عمل کی بنیادی شرائط میں سے ایک شرط بانی پی ٹی آئی سے ملاقات کی اجازت دینا بھی تھی، لیکن ملاقاتوں پر مسلسل پابندی مذاکراتی عمل میں ایک بڑی رکاوٹ بنی رہی۔
چیئرمین بیرسٹر گوہر خان:
یہ بات سراسر جھوٹ، بے بنیاد اور گمراہ کن ہے۔ ہم خان صاحب سے ملاقات کے لیے ہر ممکن کوشش کرتے رہے ہیں، چاہے وہ عدالتی احکامات کے ذریعے ہو، مذاکرات کے ذریعے ہو یا دیگر دستیاب ذرائع سے۔ بدقسمتی سے ہماری تمام تر کوششوں کے باوجود ہمیں خان صاحب سے ایک بھی ملاقات… pic.twitter.com/a8e1z7ZUtU— Barrister Gohar Khan (@BarristerGohar) November 2, 2026
بیرسٹر گوہر نے مزید کہا کہ ملاقاتوں پر پابندی اکتوبر میں پیش آنے والے افسوسناک واقعات اور حالات کی خرابی کی ایک بڑی وجہ بنی، جس کا پورے ملک نے مشاہدہ کیا۔
انہوں نے کہا کہ وہ نہ صرف مخصوص الزام کو دوٹوک انداز میں مسترد کرتے ہیں بلکہ متعلقہ شخصیت کے انٹرویو میں پاکستان تحریک انصاف کے اندرونی معاملات، بانی پی ٹی آئی کی ہدایات اور عمران خان و بشریٰ بی بی سے متعلق ملاقاتوں کے حوالے سے کیے گئے تمام دعوؤں کی بھی سختی سے تردید کرتے ہیں۔
مزید پڑھیں: چیئرمین پی ٹی آئی بیرسٹر گوہر سمیت 20 سے زیادہ وکلا کے خلاف مقدمہ کیوں درج کیا گیا؟
ان کا کہنا تھا کہ بیرسٹر سیف کے انٹرویو میں بیان کی گئی باتیں حقائق کے برعکس، بے بنیاد اور سراسر غلط ہیں، بیرسٹر گوہر نے اس امر پر افسوس کا اظہار کیا کہ ان کے بقول اس نوعیت کے بے بنیاد الزامات ایک ایسی شخصیت کی جانب سے عائد کیے گئے ہیں۔
پی ٹی آئی چیئرمین نے کہا کہ وہ ہر الزام کا جواب دینا ضروری نہیں سمجھتے، تاہم اگر ضرورت پیش آئی تو مناسب وقت پر تمام معاملات کی تفصیلات کے ساتھ وضاحت کریں گے۔
