معروف پاکستانی اداکار اور فلم ساز معمر رانا کی اہلیہ مہناز معمر رانا نے عدالت سے خلع حاصل کرلی، جس کے بعد دونوں کی ازدواجی زندگی قانونی طور پر ختم ہوگئی ہے۔
لاہور کی فیملی کورٹ کے جج زاہد بشیر نے 29 اکتوبر کو مہناز معمر رانا کی درخواست منظور کرتے ہوئے نکاح ختم کرنے کا فیصلہ سنایا۔
مہناز نے رواں سال 22 جون کو خلع کے لیے درخواست دائر کی تھی، جس میں مؤقف اختیار کیا گیا تھا کہ وہ اور ان کی بیٹیاں گزشتہ 2 دہائیوں سے شدید ذہنی اذیت کا سامنا کر رہی ہیں۔
یہ بھی پڑھیں: معمر رانا نے طلاق کی افواہوں پر خاموشی توڑ دی، عدالتی دستاویزات سے متعلق اہم انکشاف
جبکہ شوہر کی جانب سے مالی معاونت نہ ملنے کے باعث گھر کے تمام اخراجات بھی وہ خود برداشت کر رہی ہیں۔
درخواست میں کہا گیا تھا کہ مہناز اور ان کے اہل خانہ نے معمر رانا کے رویے میں بہتری لانے کے لیے متعدد کوششیں کیں، تاہم اداکار نے اپنی مبینہ لت کے علاج سے انکار کیا اور غصے میں پرتشدد رویہ اختیار کرنے کا سلسلہ بھی ترک نہیں کیا۔
خلع کی درخواست میں معمر رانا کی جانب سے اہلیہ اور بیٹیوں پر مبینہ جسمانی اور ذہنی تشدد کو بھی ازدواجی تعلق ختم کرنے کی وجوہات میں شامل کیا گیا تھا۔
مزید پڑھیں: ’جو مرضی کہتے رہیں مجھے فرق نہیں پڑتا‘، معمر رانا کا متنازع ویڈیو پر ردعمل
مہناز نے اپنی ایک بیٹی کو بطور گواہ بھی پیش کیا تھا۔
اس سے قبل معاملے کو متبادل طریقہ کار برائے تنازعات کے حل کے تحت باہمی رضامندی سے حل کرنے کے لیے دونوں فریقین کو ثالثی کے لیے طلب کیا گیا تھا۔
لاہور کے اے ڈی آر سینٹر 3 کی جانب سے جاری خط کے مطابق معمر رانا ثالثی کے لیے پیش ہوئے، تاہم مہناز نے اس عمل میں شرکت سے انکار کردیا، جس کے بعد معاملہ دوبارہ عدالت کو بھیج دیا گیا تھا۔
