چیف الیکشن کمشنر سکندر سلطان راجہ کو اسلام آباد میں بلدیاتی انتخابات کے انعقاد کے حوالے سے انتخابی تیاریوں اور اب تک کیے گئے اقدامات پر بریفنگ دی گئی۔
الیکشن کمیشن کی جانب سے جاری اعلامیے کے مطابق بریفنگ سیکریٹری الیکشن کمیشن اور دیگر سینئر افسران نے دی، جس میں چیف الیکشن کمشنر کو اسلام آباد کے بلدیاتی نظام، مختلف نشستوں پر انتخابات کے طریقہ کار، اب تک کیے گئے اقدامات اور آئندہ کے لائحہ عمل سے آگاہ کیا گیا۔
بریفنگ میں بتایا گیا کہ انتخابات کے لیے تمام انتخابی مٹیریل کی خریداری کا عمل مکمل ہوچکا ہے، جبکہ بیلٹ پیپرز کی پرنٹنگ کے انتظامات بھی مکمل ہیں۔
یہ بھی پڑھیں: الیکشن کمیشن کا اسلام آباد میں بلدیاتی انتخابات کرانے کا اعلان
اس سلسلے میں سیکریٹری وزارت داخلہ، انسپکٹر جنرل پولیس اسلام آباد اور ڈپٹی کمشنر اسلام آباد کو ضروری انتخابی انتظامات کے حوالے سے خطوط بھی ارسال کر دیے گئے ہیں۔
الیکشن کمیشن حکام نے بتایا کہ کمیشن اسلام آباد میں بلدیاتی انتخابات کے پُرامن انعقاد کے لیے تیار ہے۔
چیف الیکشن کمشنر سکندر سلطان راجہ نے اب تک کیے گئے انتظامات پر اطمینان کا اظہار کیا اور ہدایت کی کہ 10 نومبر 2026 بروز منگل الیکشن کمیشن سیکرٹریٹ میں ایک اجلاس طلب کیا جائے۔
مزید پڑھیں: بلدیاتی انتخابات: الیکشن کمیشن کو ڈائریکشن دی جاسکتی ہے، اسلام آباد ہائیکورٹ
اعلامیے کے مطابق اجلاس میں سیکریٹری وزارت داخلہ، چیف کمشنر اسلام آباد اور آئی جی اسلام آباد کو مدعو کیا جائے گا، جہاں وہ الیکشن کمیشن کو سیکیورٹی پلان اور دیگر انتظامی امور پر بریفنگ دیں گے۔
الیکشن کمیشن کے مطابق اجلاس کا مقصد اسلام آباد میں بلدیاتی انتخابات کے پُرامن اور منظم انعقاد کے لیے انتظامات کا جائزہ لینا ہے۔
