فاؤنڈیشن یونیورسٹی اسلام آباد کی فیکلٹی آف ری ہیبلیٹیشن اینڈ الائیڈ ہیلتھ سائنسز کے ڈین اور کالج آف فزیکل تھراپی اینڈ الائیڈ ہیلتھ سائنسز کے پرنسپل فرقان احمد صدیقی نے کہا ہے کہ دنیا کے 75 نمایاں فزیوتھراپسٹس میں کسی پاکستانی کا نام شامل ہونا ان کے لیے ہی نہیں بلکہ پاکستان اور ملک میں فزیوتھراپی کے شعبے کے لیے بھی ایک بڑی کامیابی ہے۔ انہوں نے اپنی اس کامیابی کو والدہ کے نام کرتے ہوئے کہا کہ آج وہ جس مقام پر ہیں، اس میں ان کے والدین کی دعاؤں کا بنیادی کردار ہے۔
وی نیوز سے گفتگو کرتے ہوئے فرقان احمد صدیقی نے کہا کہ دنیا کے 75 نمایاں فزیوتھراپسٹس میں ان کا نام آنا ان کی پیشہ ورانہ زندگی کا ایک اہم اعزاز ہے۔ ان کے مطابق یہ کامیابی ان کے لیے خوشی اور فخر کا باعث ہے، کیونکہ اس کے ذریعے عالمی سطح پر پاکستان کے فزیوتھراپی کے شعبے کو بھی نمائندگی ملی ہے۔
انہوں نے کہا کہ پاکستان میں فزیوتھراپی کے بارے میں آگاہی کا عمل ابھی جاری ہے، تاہم لوگوں میں اس شعبے کی اہمیت سے متعلق شعور بڑھ رہا ہے اور ملک میں فزیوتھراپی کا شعبہ تیزی سے ترقی کر رہا ہے۔
فرقان احمد صدیقی نے بتایا کہ وہ اس وقت فاؤنڈیشن یونیورسٹی اسلام آباد میں فیکلٹی آف ری ہیبلیٹیشن اینڈ الائیڈ ہیلتھ سائنسز کے ڈین اور کالج آف فزیکل تھراپی اینڈ الائیڈ ہیلتھ سائنسز کے پرنسپل کی حیثیت سے خدمات انجام دے رہے ہیں۔
انہوں نے بتایا کہ ادارے میں ابتدائی طور پر ڈاکٹر آف فزیکل تھراپی (ڈی پی ٹی) پروگرام شروع کیا گیا، جس کے بعد ماسٹرز اور پھر پی ایچ ڈی پروگرام متعارف کرائے گئے۔
ان کے مطابق ادارے میں الائیڈ ہیلتھ سائنسز کے تحت 6 مختلف شعبوں میں بیچلر ڈگری پروگرام بھی شروع کیے گئے ہیں، جن میں میڈیکل امیجنگ ٹیکنالوجی، میڈیکل لیبارٹری ٹیکنالوجی، ہیومن نیوٹریشن اینڈ ڈائیٹیٹکس، ڈینٹل ٹیکنالوجی، سرجیکل ٹیکنالوجی اور آپٹومیٹری شامل ہیں۔
انہوں نے ادارے کی بین الاقوامی ایکریڈیٹیشن کا ذکر کرتے ہوئے اسے بھی ایک اہم کامیابی قرار دیا۔
فرقان احمد صدیقی نے کہا کہ جب انہوں نے فزیوتھراپی کالج شروع کیا تو ان کا بنیادی مقصد ایسے اہل اور تربیت یافتہ ہیلتھ پروفیشنلز تیار کرنا تھا جو عملی زندگی میں مؤثر انداز میں خدمات انجام دے سکیں۔
انہوں نے بتایا کہ ادارے میں تعلیمی سرگرمیوں کے ساتھ طلبہ کی شخصیت سازی، نظم و ضبط اور غیر نصابی سرگرمیوں پر بھی خصوصی توجہ دی جاتی ہے۔
ان کے مطابق طلبہ کے لیے اسپورٹس ویک، اسٹوڈنٹ ویک اور مختلف اہم دنوں کی مناسبت سے تقریبات منعقد کی جاتی ہیں، تاکہ وہ اپنے شعبے کی اہمیت کو بہتر انداز میں سمجھ سکیں اور معاشرے میں اس کے بارے میں آگاہی پیدا کر سکیں۔ مزید ان کا کیا کہنا تھا جانیے اس ویڈیو رپورٹ میں۔
