پاکستانی روزانہ یوٹیوب پر کتنی ویڈیوز دیکھتے ہیں؟ حیران کن اعداد و شمار سامنے آگئے

پاکستان میں یوٹیوب استعمال کرنے والوں کی تعداد تقریباً 9 کروڑ 60 لاکھ تک پہنچ گئی ہے، جبکہ ملک بھر میں صارفین روزانہ اس پلیٹ فارم پر تقریباً 56 کروڑ ویڈیوز دیکھتے ہیں۔

یہ اعداد و شمار پاکستان ٹیلی کمیونیکیشن اتھارٹی (پی ٹی اے) کے چیئرمین میجر جنرل (ر) حفیظ الرحمان نے منگل کو قومی اسمبلی کی قائمہ کمیٹی برائے انفارمیشن ٹیکنالوجی و ٹیلی کمیونیکیشن کے اجلاس میں پیش کیے۔

اجلاس کے دوران چیئرمین پی ٹی اے نے ارکان اسمبلی کو پاکستان میں سوشل میڈیا پلیٹ فارمز کے استعمال سے متعلق بریفنگ دی۔

انہوں نے بتایا کہ یوٹیوب ملک کے سب سے زیادہ استعمال ہونے والے ڈیجیٹل پلیٹ فارمز میں شامل ہوچکا ہے، جہاں لاکھوں پاکستانی روزانہ مختلف نوعیت کی ویڈیوز دیکھتے ہیں۔

چیئرمین پی ٹی اے نے یہ بھی بتایا کہ یوٹیوب ویڈیوز دیکھنے کے اعتبار سے پاکستان دنیا کے نمایاں ممالک میں شامل ہے۔

’56 کروڑ ویڈیوز کا مطلب 56 کروڑ صارفین نہیں‘

پی ٹی اے کے پیش کردہ اعداد و شمار کے مطابق روزانہ 56 کروڑ ویڈیوز دیکھے جانے کا مطلب یہ نہیں کہ اتنی ہی تعداد میں لوگ یوٹیوب استعمال کرتے ہیں۔

یہ تعداد ایک دن میں دیکھی جانے والی مجموعی ویڈیوز کی ہے، کیونکہ ایک ہی صارف دن بھر میں متعدد ویڈیوز دیکھ سکتا ہے۔

اس طرح پاکستان میں یوٹیوب کے تقریباً 9 کروڑ 60 لاکھ صارفین کی جانب سے روزانہ مجموعی طور پر 56 کروڑ ویڈیوز دیکھی جاتی ہیں۔

پاکستان میں واٹس ایپ صارفین کی تعداد 10 کروڑ

قومی اسمبلی کی قائمہ کمیٹی کو یوٹیوب کے علاوہ ٹک ٹاک اور واٹس ایپ سمیت دیگر بڑے سوشل میڈیا اور رابطے کے پلیٹ فارمز کے استعمال سے متعلق بھی آگاہ کیا گیا۔

چیئرمین پی ٹی اے کے مطابق پاکستان میں واٹس ایپ استعمال کرنے والوں کی تعداد تقریباً 10 کروڑ ہے، جبکہ اس پلیٹ فارم کے ذریعے روزانہ اربوں پیغامات اور کالز کا تبادلہ ہوتا ہے۔

اجلاس میں ارکان اسمبلی نے ملک میں ڈیجیٹل پلیٹ فارمز پر بڑھتے ہوئے انحصار پر تبادلہ خیال کیا اور انٹرنیٹ اور موبائل نیٹ ورک سروسز کے معیار سے متعلق خدشات بھی اٹھائے۔

یہ بریفنگ ایسے وقت میں دی گئی جب پاکستان میں ڈیجیٹل پلیٹ فارمز کا استعمال مسلسل بڑھ رہا ہے اور انٹرنیٹ و موبائل رابطوں کی معیاری سہولیات کی اہمیت میں بھی اضافہ ہو رہا ہے۔