عوامی نیشنل پارٹی (اے این پی) خیبر پختونخوا کے صدر ایمل ولی خان نے کہا ہے کہ خیبر پختونخوا کی حکومت حلوہ نہیں جو ہر کوئی کھائے۔
مولانا فضل الرحمان کی صحافیوں سے گفتگو پر رد عمل دیتے ہوئے انہوں نے کہا کہ ہم حکومتوں کے بھوکے اور بھکاری نہیں، میں نے کسی بزرگ کی بڑی کرپشن کی بات نہیں کی۔ پختونخوا میں مذہب کے نام پر جو من و سلویٰ جاری ہے، ابھی اس کا ذکر بھی نہیں کیا۔
ایمل ولی نے کہا کہ میں نے صرف گورنر کی بات کی، قوم کو پتہ ہے کہ وہ مولانا اور ان کی پارٹی کے لیے شرم کا باعث بن چکا ہے۔ خود کا کِیا دوسروں پر ڈالنا آسان ہے، اپنے سمدھی اور فیصلوں کو اپنانے کی ہمت پیدا کریں۔
ان کا کہنا تھا کہ غلام علی کی حمایت کرنا میری بڑی غلطی ہے اور اسے تسلیم کرتا ہوں۔ معلوم نہیں تھا کہ یہ کیسا شخص ہے۔
انہوں نے کہا کہ پیغام دیا جا رہا ہے کہ میں سب کچھ اسٹیبلشمنٹ کے کہنے پر کر رہا ہوں، جو الزام لگایا گیا ہے ہمت پیدا کر کے اسے ثابت بھی کریں، ہم نے منہ کھولا تو کچھ نہیں بچے گا۔ ️آپ نے غلام احمدبلور پر بھی جے یو آئی میں شمولیت کے لیے جرگہ کیا لیکن ان کا جواب سن کر آپ کی حالت دیکھنے کے لائق تھی۔
اے این پی رہنما نے مولانا فضل الرحمان کو مخاطب کرتے ہوئے کہا کہ دین کا لباس اوڑھے آپ نے ملک کا جو حشر کیا ایک دن اس کا جواب دینا ہوگا۔ آپ کی حکومت ایم ایم اے (ملا ملٹری الائنس) کی صورت میں ہی ممکن ہے۔
انہوں نے مزید کہا کہ ہم آئندہ انتخابات میں بھرپور حصہ لیں گے، زیادہ تر امیدواران نامزد ہو چکے ہیں۔ الیکشن میں بھرپور حصہ لیا جائے گا، اے این پی کسی بیساکھی کی محتاج نہیں، عوام ہماری طاقت ہے اور رہے گی۔
