رہنما پاکستان استحکام پارٹی فواد چوہدری اب یوٹیوب شو کریں گے جب کہ ذرائع کا دعوٰی ہے کہ اسی یو ٹیوب چینل پر سابق گورنر سندھ عمران اسماعیل کوکنگ شو کرتے ہوئے نئے روپ میں نظر آئیں گے۔
وی نیوز کے رابطہ کرنے پر تحریک انصاف کے سابق رہنما فواد چوہدری نے تصدیق کرتے ہوئے بتایا کہ وہ جلد ہی ایک یوٹیوب پلیٹ فارم کا حصہ بنیں گے، جس کا آغاز آئندہ ماہ اگست میں متوقع ہے۔
ذرائع کے مطابق سابق وفاقی وزیر فواد چوہدری اور سابق گورنر سندھ عمران اسماعیل کے علاوہ دیگر نامور سیاستدان بھی اس یوٹیوب چینل پر شوز کریں گے، جن میں سابق لیگی وزیر خزانہ مفتاح اسماعیل، سابق وزیر مملکت محسن شاہنواز رانجھا، وزیر مملکت مصدق ملک اور مصطفٰی نواز کھوکھر بھی شامل ہیں۔ تاہم مفتاح اسماعیل نے شو میں شرکت کے حوالے سے تردید کی ہے۔
وی نیوز کو ان رہنماؤں کے قریبی ذرائع سے معلوم ہوا ہے کہ یہ تمام رہنما جلد ایک ہی یوٹیوب چینل پر مختلف پروگرام کرتے ہوئے نظر آئیں گے، جس میں سیاست کے علاوہ کچھ غیر سیاسی شوز بھی شامل ہیں۔
ذرئع کے مطابق تمام سیاسی رہنما ایک ہی پلیٹ فارم یعنی ایک ہی یوٹیوب چینل پر نظر آئیں گے جسے اگست میں شروع کرنے کی تیاریاں کی جارہی ہیں۔ اس چینل پر سیاسی رہنما سیاست سے ہٹ کر بھی پروگرام پیش کریں گے۔
ماضی میں بھی فواد چوہدری، مصطفٰی نواز کھوکھر اور مصدق ملک ایک نجی ٹی وی چینل پر پروگرام کر چکے ہیں، جب کہ مفتاح اسماعیل نے چند دیگر سیاسی رہنماؤں کا سیاسی رہنماؤں کے ساتھ مل کر ری امیجن پاکستان کے نام سے ایک نیا سلسلہ بھی شروع کیا تھا۔
ذرائع نے دعویٰ کیا ہے کہ مفتاح اسماعیل بھی اس یوٹیوب چینل پر پروگرام کریں گے تاہم انہوں نے اس بات کی تردید کرتے ہوئے کہا کہ “عید سے قبل مجھے پروگرام کرنے کی دعوت دی گئی تھی جس کے جواب میں میں نے کہا تھا کہ میں سوچ کر بتاؤں گا، میرا ایسا کوئی ارادہ نہیں ہے۔”
واضح رہے کہ موجودہ سیاسی صورتحال میں حالات حاضرہ کے کچھ مشہور اینکرز حال ہی میں غیر سیاسی شوز کرنے کا اعلان کرتے ہوئے اپنے پرانے پروگرام سے دستبردارہوگئے تھے۔
