چیٸرمین استحکام پاکستان پارٹی جہانگیر ترین نے کہا ہے کہ ملک کو مشکلات سے نکالنے کے لیے ہی آئی پی پی وجود میں آئی ہے، موجودہ حالات کے پیش نظر ملکی مفادات پارٹی مفادات سے زیادہ عزیز ہیں، آئی ایم ایف سے معاہدہ ابھی زیر تکمیل ہے، اس وقت ملک کو استحکام کی اشد ضرورت ہے، ان حالات میں وفاقی کابینہ سے علیحدگی اختیار کرکے منفی تاثر نہیں دینا چاہتے، عون چوہدری اور نعمان لنگڑیال وفاقی وزیر اور بدستور وفاقی کابینہ کا حصہ رہیں گے۔
جہانگیر خان ترین نے اپنے ایک بیان میں کہا ہے کہ ملک میں سیاسی استحکام کے لیے متحد ہونے کا پیغام دینا چاہتے ہیں۔ آئی ایم ایف ملک میں سیاسی و معاشی استحکام دیکھنا چاہتا ہے۔ استحکام پاکستان پارٹی سیاسی استحکام پر یقین رکھتی اور ایک ذمہ دار پارٹی ہے۔ حکومت کی مدت مکمل ہونے تک دونوں وزرا وفاقی کابینہ کا حصہ رہیں گے۔ سیاسی استحکام معاشی استحکام سے جڑا ہے۔
ان کا کہنا تھا کہ آنے والے انتخابات میں سیاسی فیصلے اس وقت کی صورت حال کے مطابق کریں گے۔ پارٹی سیاست کا محور و مرکز ملک میں سیاسی و معاشی استحکام لانا ہے۔ آئی پی پی کا وجود پاکستان کی سلامتی کے ساتھ جڑا ہے۔ ملکی سلامتی اور استحکام سے بڑھ کر کچھ بھی نہیں۔ پہلی ترجیح مستحکم پاکستان ہے۔
