ہم وقت سے پہلے ہی چلے جائیں گے، وزیراعظم شہباز شریف

وزیراعظم پاکستان شہباز شریف نے کہا ہے کہ آئندہ ماہ ہماری حکومت کی مدت ختم ہونے جا رہی ہے اور ہم وقت سے پہلے ہی چلے جائیں گے۔

گورنمنٹ کالج ویمن یونیورسٹی سیالکوٹ میں لیپ ٹاپ تقسیم کرنے کی تقریب سے خطاب کرتے ہوئے انہوں نے کہا کہ اگر نواز شریف کی قیادت میں ہمیں دوبارہ اقتدار میں آنے کا موقع ملا تو ملک کو ترقی یافتہ بنائیں گے اور ہر بچی کو لیپ ٹاپ دیا جائے گا۔

وزیراعظم نے کہا کہ حکومت نے تیل اور پیٹرول کی قیمتوں میں کمی کا اعلان کیا ہے۔ اس کی وجہ یہ ہے کہ آئی ایم ایف معاہدے کی وجہ سے روپے کی قدر مضبوط ہوئی ہے اور ڈالر سستا ہوا۔

شہباز شریف نے کہا کہ ایک وقت تھا جب مسلمان اپنے علم کی بدولت دنیا پر حاوی تھا مگر آج ہمیں علم حاصل کرنے کے لیے مغرب کا رخ کرنا پڑتا ہے۔ یاد رکھیں کہ علم کی بدولت ہی ترقی کی منازل طے کی جا سکتی ہیں۔

وزیراعظم نے کہا کہ پاکستان صرف پنجاب نہیں، بلکہ 4 صوبوں سمیت آزادکشمیر اور گلگت بلتستان کو ملا کر ملک بنتا ہے۔

انہوں نے کہا کہ جب میں وزیراعلیٰ پنجاب بنا تو سوچتا تھا کہ تمام صوبوں میں میرٹ کی بنیاد پر طلبا و طالبات کو لیپ ٹاپس ملنے چاہییں۔

 ان کا کہنا تھا کہ طلبا وطالبات کو میرٹ پر لیپ ٹاپ فراہم کرنا کسی پر احسان نہیں یہ حکومت کی ذمہ داری ہے، ہم نے اس منصوبے کا 2011 میں آغاز کیا تھا۔

وزیراعظم شہباز شریف نے کہا کہ کوئی قوم اس وقت تک برق رفتاری سے ترقی نہیں کر سکتی جب تک اس کی خواتین کو برابری کے مواقع میسر نہ ہوں، ہم نے رواں مالی سال خواتین کے لیے 5 ارب روپے رکھے ہیں۔

انہوں نے کہا کہ تعلیم یافتہ خواتین شادی کے بعد گھروں میں بیٹھ جاتی ہیں، ہمیں اس روایت کو ختم کرنا ہوگا، کیوں کہ دنیا بھر میں خواتین مردوں کے شانہ بشانہ خدمات انجام دے رہی ہیں۔