حکومت کی جانب سے اراکین پارلیمنٹ کو اپنے علاقوں میں ترقیاتی منصوبوں کے لیے اقساط میں پیسے ریلیز کرنے کا عمل شروع کردیا گیا ہے اور ایم این ایز کو 20 ارب روپے سے زائد کی رقم جاری کر دی گئی ہے۔
حکومت کی جانب سے اراکین پارلیمنٹ کے لیے ترقیاتی بجٹ کی مد میں 61 ارب روپے کی فراہمی کے سلسلے کا آغاز کردیا گیا۔
ذرائع پلاننگ کمیشن نے بتایا کہ ایم این ایز کو ترقیاتی منصوبوں کے لیے اقساط میں فنڈز ریلیز کرنے کا عمل شروع ہوگیا ہے، اب تک ایم این ایز کو 20 ارب روپے سے زائد رقم جاری کر دی گئی ہے۔
ذرائع نے بتایا کہ اگست تک 61 ارب روپے سے زائد کی رقم جاری کر دی جائے گی، اگست تک 20 ارب روپے گزشتہ سال کےاور 41 ارب رواں مالی سال کے جاری ہوں گے اور پورے سال کے لیے مختص 90 ارب میں سے 41 ارب روپے موجودہ حکومت خرچ کرے گی۔
ذرائع کے مطابق وزارت خزانہ نے اسکیموں کے لیے فنڈز جاری کرنے کی گزشتہ ہفتہ اجازت دی تھی، فنڈز کا اجرا وزارت خزانہ کے گزشتہ ہفتے فائنل کیے گئے میمورینڈم کی بنیاد پر کیا گیا اور پی ایس ڈی پی کی مد میں 142 ارب 50 کروڑ روپے سے زائد کی رقم جاری کر دی گئی ہے۔
