سری لنکا کے خلاف جاری ٹیسٹ میچ میں سر پر باؤنسر لگنے سے زخمی ہونے والے سرفراز احمد کی جگہ محمد رضوان کو متبادل کھلاڑی کے طور پر پلینگ الیون میں شامل کر لیا گیا۔
پاکستان کرکٹ بورڈ کی جانب سے بدھ کو جاری کردہ پریس ریلیز میں بتایا گیا ہے کہ سرفراز احمد کے زخمی ہونے کے بعد محمد رضوان متبادل کھلاڑی کے طور پر جاری ٹیسٹ کا حصہ بنیں گے۔
پاکستان اور سری لنکا کے درمیان سنگھالیز اسپورٹس کلب میں دوسرا ٹیسٹ میچ کھیلا جا رہا ہے۔
میچ ریفری ڈیوڈ بون نے پاکستانی ٹیم کی انتظامیہ کی جانب سے متبادل کھلاڑی کے لیے کی گئی درخواست کو تسلیم کر لیا ہے۔
سرفراز احمد ٹیسٹ میچ کے تیسرے روز دوپہر کے سیشن میں اسیتھا فرنانڈو کا تیز باؤنسر سر پر لگنے کی وجہ سے زخمی ہوئے تھے۔
