کوئٹہ سے پشاور جانے والی جعفر ایکسپریس ٹرین کے واش روم میں دھماکا ہوا ہے۔ ریسکیو ذرائع کے مطابق دھماکے سے ایک مسافر خاتون جاں بحق جبکہ 7 افراد زخمی ہو گئے۔
نمائندہ وی نیوز کے مطابق دھماکا ملتان ڈویژن کی چیچہ وطنی کی رینج میں ہوا ہے۔ زخمی مسافروں کو ڈی ایچ کیو چیچہ وطنی اسپتال منتقل کردیا گیا ہے ۔
ریلوے حکام کا کہنا ہے کہ دھماکے کی نوعیت معلوم کی جارہی ہے۔
نگران وزیراعلیٰ پنجاب محسن نقوی نے چیچہ وطنی کے قریب جعفر ایکسپریس میں دھماکے کے واقعہ کا نوٹس لے لیا۔ انسپکٹر جنرل پولیس سے رپورٹ طلب کر لی ۔
ساہیوال کے کمشنر، آر پی او، ڈپٹی کمشنر اور ڈی پی او کو فی الفور جائے وقوعہ پر پہنچنے کی ہدایت کی گئی ہے۔ نگران وزیراعلیٰ پنجاب محسن نقوی نے حکم دیا ہے کہ زخمیو ں کو علاج معالجے کی بہترین سہولتیں فراہم کی جائیں۔
