امریکی ریاست ہوائی کے جنگل میں گزشتہ دنوں لگنے والی آگ سے ہونے والے معاشی نقصان کا اندازہ 4 سے 6 ارب ڈالر کے درمیان لگایا گیا ہے۔
غیر ملکی میڈیا کے مطابق تباہی کے خطرے کی ماڈلنگ اور حل کرنے والی عالمی کمپنی موڈیز آر ایم ایس کے مطابق یہ اندازہ مادی اثاثوں کو پہنچنے والے نقصان سے براہ راست اور بالواسطہ نقصانات کی عکاسی کرتا ہے۔
رپورٹ میں بتایا گیا کہ اس میں ریاست ہوائی کے جی ڈی پی پر آگ کے اثرات، تباہی کے ردعمل پر حکومتی اخراجات یا آگ کی سماجی لاگت کو مدنظر نہیں رکھا گیا بلکہ تخمینہ میں املاک، تجارت، صنعت، گاڑیو ں اور انفرا اسٹرکچر کو پہنچنے والے نقصان کا احاطہ کیا گیا ہے۔
موڈیز آر ایم ایس کے لگائے گئے تخمینے کے مطابق زیادہ تر نقصانات تاریخی قصبے لہینہ میں ہوئے ہیں جہاں آگ سے 2100 ایکڑ رقبہ متاثر ہوا ہے۔
رپورٹ میں بتایا گیا ہے کہ بحالی کا عمل طویل مدت پر محیط ہو گا اور اس کے دوران اشیا کی قیمتوں میں اضافے کی وجہ سے تعمیر نو پر لاگت بھی بڑھ جائے گی۔
عالمی کمپنی کی رپورٹ کے مطابق انشورنس سے تقریباً 75 فیصد یا اس سے زیادہ نقصان کے ازالے کی توقع ہے۔ واضح رہے کہ اس آگ سے اموات 115 تک پہنچ گئی ہیں جبکہ 1100 افراد لاپتا ہیں۔