کراچی کی انسداد دہشتگردی عدالت نے 9 مئی کے پر تشدد واقعات میں نامزد پی ٹی آئی کے رہنماؤں فردوس شمیم نقوی سمیت 2 ملزمان کی درخواست ضمانت منظور کر لی ہے۔
تحریک انصاف کے رہنماؤں اور کارکنوں کی درخواست ضمانت پر انسداد دہشتگردی کی عدالت میں سماعت ہوئی۔
مزید پڑھیں
کراچی کے ٹیپو سلطان تھانے میں درج ہونے والے مقدمے میں پی ٹی آئی رہنما فردوس شمیم نقوی سمیت 2 ملزمان کی ضمانت منظور کر لی گئی۔ عدالت نے ایک ایک لاکھ روپے کے مچلکوں کے عوض ضمانت منظور کی۔
عدالت نے دیگر ملزمان کی ضمانت کی درخواست پر اعتراض عائد کر دیا۔ عدالت کی جانب سے کہا گیا کہ ایک ملزم کی 2 ، 2 درخواستیں دائر کی گئیں، پہلے درخواستوں کا مسئلہ حل کریں، پھر ضمانت کا فیصلہ کریں گے۔
عدالت کی جانب سے 17 ملزمان کی ضمانت کی درخواست پر فیصلہ موخر کر دیا گیا۔
واضح رہے کہ پولیس نے پی ٹی آئی رہنما فردوس شمیم نقوی کو 14 مئی کو ان کے خلاف درج مقدمات میں گرفتار کیا تھا۔ پی ٹی آئی کے چیئرمین عمران خان کی گرفتاری کے بعد ریلی نکالنے پر فردوس شمیم پر مقدمہ درج کیا گیا تھا۔
