پاکستان سپر لیگ کے چوتھے میچ میں اسلام آباد یونائیٹڈ نے کراچی کنگز کو باآسانی 4 وکٹوں سے ہرادیا۔
ٹام کرن نے کراچی کنگز کے شعیب ملک کو انیسویں اوور کی دوسری گیند پر فاتحانہ چھکا مار کر اسلام آباد یونائیٹد کو ایونٹ کی پہلی فتح سے ہمکنار کیا۔
نیشنل اسٹیڈیم کراچی میں کھیلے گئے اس میچ میں کراچی کنگز کی جانب سے 174 رنز کا ہدف اسلام آباد یونائیٹڈ نے 6 وکٹیں گنواتے ہوئے 19ویں اوور میں عبور کیا۔
اس سے قبل اسلام آباد یونائیٹڈ کے کپتان شاداب خان نے ٹاس جیت کر کراچی کنگز کو پہلے بیٹنگ کرنے کی دعوت دی۔ کراچی کی جانب سے حیدر علی 59 اور شرجیل خان 34 رنز بناکر نمایاں رہے۔
اسلام آباد یونائیٹڈ کی جانب سے رومان رئیس، محمد وسیم اور ٹام کرن نے دو دو جبکہ فہیم اشرف نے ایک وکٹ لی۔
🌟 of the show! #HBLPSL8 l #SabSitarayHumaray l #KKvIU pic.twitter.com/VeCHL6YTnn
— PakistanSuperLeague (@thePSLt20) February 16, 2023
جواب میں اسلام آباد نے 18.2 اوورز میں 6 وکٹوں کے نقصان پر ہدف حاصل کرلیا۔ اسلام آباد یونائیٹڈ کی جانب سے کولن منرو 58 اور اعظم خان 44 رنز بناکر نمایاں بلے باز رہے۔
کراچی کی جانب سے محمد عامر اور محمد موسیٰ نے دو دو کھلاڑیوں کو آؤٹ کیا۔
آٹھویں پی ایس ایل میں کراچی کنگز کی یہ مسلسل دوسری شکست ہے۔ اس سے قبل کراچی کنگز پشاور زلمی سے اپنا پہلا میچ ہار چکی ہے۔
