ایشیا کپ سپر فور مرحلہ: بنگلہ دیش کیخلاف قومی ٹیم کا اعلان

ایشیا کپ 2023 کے سپر فور مرحلے کا آغاز کل سے ہو رہا ہے، پاکستان اور بنگلہ دیش کی ٹیمیں کل لاہور کے قذافی اسٹیڈیم میں آمنے سامنے ہوں گی، سپر فور مرحلے کے پہلے میچ کے لیے ٹیم کا اعلان کر دیا دیا گیا ہے۔

کل کے میچ کے لیے قومی ٹیم میں ایک تبدیلی کی گئی ہے، فاسٹ بولنگ آل راؤنڈر فہیم اشرف نے اسپنر محمد نواز کی جگہ لے لی ہے۔

قومی ٹیم کی قیادت کپتان بابر اعظم کریں گے، اس کے علاوہ ٹیم میں امام الحق، فخر زمان، افتخار احمد، محمد رضوان، سلمان علی آغا، شاداب خان، فہیم اشرف، حارث رؤف، شاہین آفریدی اور نسیم شاہ شامل ہیں۔

واضح رہے کہ اس سے قبل پاکستان ایونٹ کے 2 میچ کھیل چکا ہے، پہلے میچ میں پاکستان نے نیپال کو شکست دے دی تھی، جبکہ بھارت کے خلاف دوسرا میچ بے نتیجہ ختم ہو گیا تھا۔

ایشیا کپ 31 اگست سے 17 ستمبر تک شیڈول ہے، ایونٹ کے 4 میچز پاکستان میں جبکہ 9 میچز سری لنکا میں ہوں گے۔