رواں سال بھارت میں ہونے والے آئی سی سی کرکٹ ورلڈکپ کے میچز اسٹیڈیم میں دیکھنے کی خواہش رکھنے والے شائقین کیلئے بڑی خوشخبری سامنے آئی ہے۔
آئی سی سی نے ورلڈ کپ 2023 کیلئے دوسرے مرحلے میں اضافی ٹکٹوں کی فروخت کا اعلان کر دیا۔
بی سی سی آئی میزبان ریاستی کرکٹ ایسوسی ایشن کے ساتھ بات چیت کے بعد ورلڈکپ کے 4 لاکھ اضافی ٹکٹس فروخت کے لیے پیش کرے گا۔
بی سی سی آئی کے مطابق اضافی ٹکٹس 8 ستمبر سے فروخت کے لیے پیش کیے جائیں گے۔
بی سی سی آئی کا کہنا ہے کہ ورلڈکپ کے اضافی ٹکٹس کے اجراء کا فیصلہ ٹکٹوں کے بڑھتی مانگ کے بعد کیا گیا ہے۔
شائقین کرکٹ کی جانب سے بھارتی کرکٹ بورڈ کو ورلڈ کپ شروع ہونے سے 100 دن پہلے ہی ٹکٹس فروخت کرنا کا سلسلہ شروع کرنے کی وجہ سے شدید تنقید کا سامنا تھا۔
آئی سی سی کرکٹ ورلڈکپ 5 اکتوبر سے بھارت کے شہر احمد آباد میں انگلینڈ بمقابلہ نیوزی لینڈ کے میچ سے شروع ہوگا۔
ورلڈ کپ بھارت کے 9 مختلف شہروں میں کھیلا جائے گا جن میں حیدر آباد، دھرم شالہ، دہلی، چنئی، لکھنو، پونے، بنگلورو، ممبئی اور کولکتہ کے میدان شامل ہیں۔
آئی سی سی کرکٹ ورلڈکپ پہلا سیمی فائنل 15 نومبر کو ممبئی جبکہ دوسرا سیمی فائنل 16 نومبر کو کولکتہ میں کھیلا جائے گا۔
میگا ایونٹ کا فائنل میچ 19 نومبر کو نریندر مودی کرکٹ اسٹیڈیم احمد آباد میں کھیلا جائے گا۔
