لاہور کے علاقہ سمن آباد کے ایک اسکول میں طالبعلم پر تشدد میں ملوث پرنسپل سمیت 3 نامزد ملزمان کو پولیس نے گرفتار کرلیا ہے۔
سمن آباد پولیس ٹیم نے 10 سالہ طالبعلم فیضان پر تشدد کا مقدمہ درج کرکے اسکول کے پرنسپل قاری عبدالودود، اکاؤنٹنٹ عظیم اور قاری حبیب کو گرفتار کیا ہے۔
ابتدائی پولیس تحقیقات کے مطابق نامزد ملزمان نے 10 سالہ طالبعلم فیضان کو اٹھا کر پٹخا جس پر بچے کو پنکھا لگنے سے شدید چوٹیں آئی، بچے پر تشدد بھی کیا گیا جس کے بعد اسکول انتظامیہ والدین کو اطلاع دیے بغیر ہسپتال لے گئی۔
ایس پی اقبال ٹاؤن محمد عثمان ٹیپو کے مطابق ہسپتال انتظامیہ نے والدین کے بغیر بچے کے علاج سے معذرت کی، بچہ 3 روز بعد اپنے ہوش وحواس میں آیا، ہوش میں آنے کے بعد بچے نے حقیقت بتائی جس پر والد نے پولیس کو اطلاع کی۔
محمدعثمان ٹیپو کے مطابق بچوں پر تشدد اور انہیں ہراساں کرنے والے کسی رعایت کے مستحق نہیں۔ سمن آباد پولیس نے اسکول پرنسپل قاری عبدالودود سمیت 3 نامزد ملزمان کو گرفتار کرکے انویسٹی گیشن ونگ کے حوالے کردیا ہے۔
