خیبر پختونخوا کی نگراں صوبائی حکومت اور پاکستان کرکٹ بورڈ (پی سی بی) نے صوبے میں 3بڑے کرکٹ میچز کرانے کا فیصلہ کیا ہے۔
پشاور میں میڈیا سے گفتگو کرتے ہوئے نگران وزیر کھیل ڈاکٹر نجیب اللہ نے کہا، افسوس کی بات ہے کہ صوبے میں کئی سال سے کوئی انٹرنیشنل میچ نہیں کھیلا گیا۔
انہوں نے کہا کہ ہم 3بڑےمیچز خیبرپختونخوا میں کروانے جارہے ہیں جن میں نیشنل اور انٹرنیشنل کھلاڑیوں کو میچز کا حصہ بنایا جائے گا۔
ڈاکٹر نجیب اللہ نے کہا کہ ارباب نیاز اسٹیڈیم ، پشاور کو جلد پی سی بی کے حوالے کردیا جائے گا، اسے میچز کے لیے مکمل تیار کرلیا جائے گا۔انہوں نے بتایا کہ 2ماہ میں حیات آباد اسٹیڈیم کو بھی پی سی بی کے حوالے کردیا جائے گا۔ اس اسٹیڈیم کو لیز پر پی سی بی کو دیا جائے گا۔
اس موقع پر پاکستان کرکٹ بورڈ کے جنرل مینیجر ڈومیسٹک کرکٹ جنید ضیاء نے کہا کہ چیئرمین پی سی بی مینجمنٹ کمیٹی ذکاء اشرف خیبرپختونخوا میں کرکٹ کے حوالے سے نہایت سنجیدہ ہیں۔
انہوں نے کہا کہ صوبے میں کرکٹ کے فروغ کے لیے پی سی بی اور صوبائی حکومت اپنا اپنا کردار ادا کریں گی۔
جنید ضیاء نے کہا کہ پی سی بی خیبرپختونخوا میں پاکستان سپر لیگ کے میچز کا انعقاد بھی کرانا چاہتا ہے، کرکٹ ٹیم میں نیا ٹیلنٹ خیبرپختونخوا سے سامنے آتا ہے اسی لیے ہم فرسٹ کلاس میچ خیبرپختونخوا میں کرانا چاہتے ہیں۔
ان کا کہنا تھا کہ پی سی بی میچز کے حوالے سے کبھی بہانے نہیں بناتی، حکومت نے خود باور کروایا ہے کہ وہ ان اسٹیڈیمز میں میچز کے انعقاد کا ارادہ رکھتی ہے۔
جنید ضیاء نے کہا کہ اسٹیڈیمز کی جانچ پڑتال کے لیے نگران وزیرکھیل نے کمیٹی بنانے کی ہدایت بھی کی ہے۔
