لاہور ہائیکورٹ کا لاہورڈویژن کے 10 تھیٹرز کھولنے کا حکم

لاہور ہائیکورٹ نے 10 تھیٹرز کھولنے کے احکامات جاری کر دئیے ہیں۔

جسٹس راحیل کامران شیخ نے تھیٹرمالکان کی درخواست پر سماعت کرتے ہوئے کہا کہ اگر درخواست گزاروں کے خلاف کسی قسم کی شکایات ہیں تو قانون کے مطابق کارروائی کی جائے۔

عدالت نے ناز، محفل، ستارہ، ورثہ، سنگم، گلستان، راوی اور نگینہ سمیت 10 تھیٹرز کو کھولنے کے احکامات جاری کرتے ہوئے درخواست نمٹا دی۔

واضح رہے کہ گزشتہ ماہ نگراں حکومت نے لاہور میں ڈرامہ ایکٹ کی خلاف ورزی پر 10 کمرشل تھیٹرز کو سیل کردیا تھا۔ نگراں وزير اطلاعات پنجاب  عامر میر نے کہا تھا کہ کمرشل تھیٹرز میں ڈراموں کے نام پر بےحیائی اور فحاشی پھیلائی جارہی تھی، تھیٹر مالکان اور پروڈیوسرز نے بار بار خبردار کے باوجود قوانین کی خلاف ورزی کی۔

حکومت کی جانب سے تھیٹرز سیل کیے جانے کے بعد تھیٹر مالکان نے لاہور ہائیکورٹ میں درخواست دائر کی تھی جس میں چیف سیکرٹری، کمشنر لاہورڈویژن سمیت دیگر کو فریق بنایا گیا تھا۔

درخواست میں کہا گیا تھا کہ حکومت نے ان کا موقف سنے بغیر تھیٹر بند کیے اور وہ کسی غیر قانونی یا غیر اخلاقی سرگرمی میں ملوث نہیں ہیں، حکومت کا یک طرفہ اقدام غیر آئینی و غیرقانونی ہے۔