بھارت نے موہالی میں آسٹریلیا کو شکست دے کر ایک روزہ میچوں میں پاکستان سے پہلی پوزیشن چھین لی جس کے بعد ایک ہی وقت میں ٹی ٹوئنٹی، ٹیسٹ اور ایک روزہ میچوں میں ’نمبر ون‘ آنے والی دنیائے کرکٹ کی دوسری ٹیم بن گئی۔ اس سے پہلے یہ کارنامہ جنوبی افریقہ کی ٹیم نے اگست 2012 میں سر انجام دیا تھا۔
پاکستان کے اس وقت 115 ریٹنگ پوائنٹس ہیں جبکہ بھارت 116 پوائنٹس لے کر نمبر ون آچکا ہے اور اگر آسٹریلیا بھارت کے خلاف جاری تین ایک روزہ میچوں کی سیریز کے اگلے دو میچز جیت جاتا
ہے تو بھارت سے نمبر ون پوزیشن چھن جائے گی۔
رواں ماہ پاکستان، بھارت اور آسٹریلیا کے درمیان نمبر ون رہنے کی ’میوزیکل چیئر‘ چلتی رہی ہے اورتینوں ٹیموں پہ کئی اتار چڑھاؤ آئے۔ پاکستان کا ایشیا کپ ٹورنامنٹ انتہائی خراب رہا تو دوسری
جانب آسٹریلیا کو ساؤتھ افریقہ کے ہاتھوں تین ایک روزہ میچوں میں مسلسل شکست ہوئی جبکہ بھارت نے سری لنکا کو شکست دے کر اپنی تاریخ کا آٹھواں ایشیا کپ کا ٹائٹل جیتا۔
ایک طرف بھارتی ٹیم تینوں فارمیٹس میں نمبر ون بن چکی ہے دوسری طرف انکے چار کھلاڑی بھرپور فارم کے ساتھ تمام فارمیٹس کی ٹاپ پوزیشنز پر براجمان ہیں۔
سوریا کمار یادیو
بین القوامی ٹی ٹوئنٹی میچوں کی بیٹرز کی رینکنگ میں بھارتی بیٹر سوریا کمار یادیو 889 ریٹنگ پوائنٹس لے کر پہلے نمبر پر موجود ہیں۔ اسی فہرست میں پاکستانی وکٹ کیپر بیٹر محمد رضوان 811 ریٹنگ پوائنٹس کے ساتھ دوسرے نمبر پر ہیں۔
محمد سراج
بھارتی پیس بولر اور ایشیا کپ فائنل میچ کے ہیرو محمد سراج اس وقت آئی سی سی کی بولرز کی رینکنگ میں 694 ریٹنگ پوائنٹس کے ساتھ پہلے نمبرپرہیں۔ آسٹریلیا کے جوش ہیزلووڈ 678 ریٹنگ پوائنٹس لے کر دوسری پوزیشن پر موجود ہیں۔
رویندر جدیجا اور روی ایشوین
بھارتی آل راؤنڈررویندر جدیجا اور سپن بولر روی ایشوین ٹیسٹ میچوں کی رینکنگ میں ٹاپ پوزیشنز پر قبضہ جمائے بیٹھے ہیں۔ ایشوین کی بولنگ کی رینکنگ میں 879 پوائنٹ کے ساتھ پہلی پوزیشن ہے جبکہ رویندر جدیجا آل راوںڈرز کی رینکنگ میں 455 ریٹنگ پوائنٹس کے ساتھ پہلے نمبر پر ہیں۔
آئی سی سی مینز کرکٹ ورلڈ کپ 2023 شروع ہونے سے قبل بھارت آسٹریلیا کے خلاف اندور اور راجکوٹ میں دو بین الاقوامی میچز کھیلے گا اور پھر ورلڈ کپ کی باقاعدہ مہم شروع کرنے سے پہلے انگلینڈ اورنیدر لینڈز کے خلاف وارم اپ میچز بھی ہوں گے۔ ورلڈ کپ میں بھارت کا پہلا میچ 8 اکتوبر کو چنئی میں آسٹریلیا کے خلاف ہو گا۔
