سندھ حکومت نے سانحہ بلدیہ فیکٹری کے عدالتی فیصلے کے بعد فیکٹریوں میں انتظامات کے جائزے کا فیصلہ کیا ہے۔ سندھ ہائی کورٹ کے حکم پر چیف سیکریٹری سندھ نے چار صوبائی محکموں کو حکم جاری کر دیا ہے کہ تمام فیکٹریوں میں حفاظتی انتظامات کو یقینی بنائیں۔ جبکہ حفاظتی انتظامات نہ کرنے والی فیکٹریوں کو سیل کردیا جائے۔
چیف سیکریٹری سندھ کی منظوری کے بعد محکمہ سروسز جنرل ایڈمنسٹریشن اینڈ کوآرڈی نیشن نے سیکریٹری محکمہ داخلہ، سیکریٹری محکمہ صنعت، سیکریٹری محکمہ ماحولیات اور سیکریٹری محکمہ بلدیات کو مراسلہ جاری کر دیا ہے۔
چیف سیکرٹری سندھ کے مراسلے میں کہا گیا ہے کہ سانحہ بلدیہ ٹاؤن کے دو سزایافتہ مجرموں کے بیانات کے مطابق کراچی کی فیکٹریوں میں حفاظتی انتظامات ناقص ہیں، آگ بجھانے کے آلات بھی نہیں ہیں۔
چیف سیکرٹری سندھ نے کہا ہے کہ فیکٹریوں میں حفاظتی اور انسانی صحت کے تحفظ کے لیے اقدامات کا جائزہ لیں۔ افسران تمام فیکٹریوں کا معائنہ کرکے جامع رپورٹ چیف سیکریٹری سندھ کو پیش کریں۔
