جناح ہاؤس حملہ کیس: صنم جاوید سمیت دیگر خواتین رہا ہوتے ہی دوبارہ گرفتار

جناح ہاؤس حملہ کیس میں رہا ہونے والی پاکستان تحریک انصاف کی کارکن صنم جاوید سمیت دیگر خواتین کو دوبارہ گرفتار کر لیا گیا ہے۔

لاہور کی انسداد دہشتگردی عدالت نے جناح ہاؤس حملہ کیس میں صنم جاوید سمیت 9 خواتین کی ضمانتیں منظور کرتے ہوئے رہائی کا حکم دیا تھا۔ آج جیل سے رہائی کے فوراً بعد پولیس نے دوبارہ گرفتار کر لیا۔

عدالت نے خدیجہ شاہ سمیت 55 ملزمان کی ضمانت کی درخواستیں خارج کر دی تھیں۔

انسداد دہشتگردی کی عدالت نے ہفتہ کے روز صنم جاوید اور دیگر کی رہائی کا حکم دیا تھا، اتوار کو چھٹی ہونے کے باعث روبکار جاری نہیں ہو سکی تھی۔ آج روبکار جاری ہونے پر خواتین کو رہائی ملی مگر پولیس نے اُدھر سے ہی دوبارہ گرفتار کر لیا۔

پی ٹی آئی کی خواتین کو تھانہ سرور روڈ میں درج مقدمہ نمبر 109/23 میں گرفتار کیا گیا ہے، منگل کو جسمانی ریمانڈ کے لیے عدالت میں پیش کیا جائے گا۔

دوسری جانب پراسیکیوشن کی جانب سے جناح ہاؤس حملہ کیس میں نامزد صنم جاوید اور دیگر کی ضمانتیں منظور ہونے کا فیصلہ لاہور ہائیکورٹ میں چیلنج کرنے کا فیصلہ بھی کر لیا گیا ہے۔

یاد رہے کہ 9 مئی کو چیئرمین پی ٹی آئی عمران خان کی القادر ٹرسٹ کرپشن کیس میں گرفتاری کے بعد پرتشدد احتجاج کرنے والے پی ٹی آئی رہنماؤں اور کارکنوں کو گرفتار کیا گیا تھا۔

صنم جاوید اور دیگر خواتین پر جناح ہاؤس لاہور پر حملہ کرنے کر الزام ہے۔