شمالی اور جنوبی وزیرستان میں سیکیورٹی فورسز کا دہشت گردوں کے ساتھ فائرنگ کا تبادلہ ہوا ہے جس کے نتیجے میں 4 جوان شہید ہو گئے جبکہ اس دوران 6 دہشت گردوں کو ہلاک کیا گیا ہے۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے خفیہ اطلاعات کی بنیاد پر شمالی وزیرستان کے علاقے غوریوم میں کارروائی عمل میں لائی، اس دوران دہشت گردوں کا سرغنہ حضرت زمان عرف خاورے سمیت 6 دہشت گردوں کو ہلاک کیا گیا۔
اس دوران دہشت گردوں کے ساتھ فائرنگ کے تبادلے میں لانس نائیک تبسم، سپاہی نعیم اختر اور سپاہی عبدالحمید شہید ہو گئے۔
آئی ایس پی آر نے بتایا کہ سیکیوٹی فورسز نے دوسری کارروائی جنوبی وزیرستان کے علاقے اسمان منزہ میں کی جہاں دہشت گردوں کے ساتھ فائرنگ کے تبادلہ میں سپاہی فرمان علی نے جان کی قربانی دی۔
آئی ایس پی آر کے مطابق علاقے میں کلیئرنس آپریشن جاری ہے، سیکیورٹی فورسز دہشت گردی کی لعنت کو ختم کرنے کے لیے پر عزم ہیں۔
ترجمان آئی ایس پی آر نے بتایا کہ دہشت گردوں کی ایسی کارروائیاں ہمارے عزم کو مزید مضبوط کرتی ہیں۔