تارا ستاریہ کو بڑا جھٹکا، مکیش بھٹ نے عاشقی-3 سے متعلق بڑا انکشاف کردیا

بالی ووڈ فلم ’عاشقی-3‘ کا پرستاروں کو بے صبری سے انتظار ہے۔ جب سے یہ خبر آئی ہے کہ ’عاشقی-3‘ کا تیسرا پارٹ آنے والا ہے، پرستار پرجوش ہیں۔ وہیں کارتک آرین کے اس فلم سے جڑنے کے بعد تو فلم سے متعلق تجسس مزید بڑھ گیا ہے۔

’عاشقی-3‘ کے مرکزی کردار یعنی ہیروئن کے نام پر افواہوں کا بازار گرم ہے۔گزشتہ دنوں بھارتی میڈیا میں یہ خبر خاصی اِن تھی کہ فلم ’عاشقی۔3‘ میں تارا ستاریہ، کارتک آرین کے ساتھ عشق لڑاتی ہوئی دکھائی دینے والی ہیں۔ میڈیا رپورٹس میں دعویٰ کیا گیا تھا کہ فلم میں جلد ہی تارا ستاریہ کو سائن کرلیا جائے گا۔

تاہم اب جو خبرآئی ہے، اسے سننے کے بعد پرستاروں کے ساتھ ساتھ اداکارہ تارا ستاریہ کو بھی بڑا جھٹکا لگا ہے۔ دراصل فلم ڈائریکٹر مکیش بھٹ نے ’عاشقی۔3‘ میں تارا ستاریہ کی کاسٹنگ سے متعلق خبروں پر کھل کر بات کی ہے۔ ایسا لگ رہا ہے، جیسے اب اداکارہ کا فلم سے پتا کٹنے والا ہے۔

تارا ستاریہ سے متعلق اڑرہی افواہوں پر مکیش بھٹ کا کہنا ہے کہ یہ سبھی افواہیں ہیں۔ تارا ستاریہ کے نام پر فلم کے مرکزی کردار کے لیے تبادلہ خیال تک نہیں کیا گیا۔ انہوں نے واضح طور پر کہا کہ مرکزی کردار کا انتخاب فلم کے میوزک کی تیاری سے مشروط ہوگا کیونکہ فلم سیریز ’عاشقی‘ میں موسیقی کو خاص اہمیت حاصل ہے۔