برطانوی وزیراعظم رشی سونک نے فلسطین کے حق میں مظاہرے پر تبصرہ کرنے پر وزیر داخلہ سویلا بریورمین کو برطرف کردیا ہے۔
برطانوی وزیر اعظم رشی سوناک نے پیر کے روز بھارتی نژاد برطانوی وزیر داخلہ سویلا بریورمین کو برطرف کر دیا ہے، سویلا بریورمین نے فلسطینیوں کے حامی مارچ کو پولیس کے ذریعے ہینڈل کرنے پر تنقید کی تھی۔
حزب اختلاف کے قانون سازوں اور اپنی ہی حکمران کنزرویٹو پارٹی کے ممبران کی جانب سے بریورمین کو برطرف کرنے کے لیے رشی سوناک پر دباؤ تھا، برطانوی وزیر اعظم رشی سوناک نے خاتون وزیر داخلہ کو عہدہ چھوڑنے کو کہا جس پر انہوں نے اپنے عہدے سے استعفی دے دیا۔
سویلا بریورمین کی جگہ برطانیہ کے سیکرٹری خارجہ جیمز کلیورلی کو وزیر داخلہ بنائے جانے کا امکان ہے۔
واضح رہے کہ گزشتہ ہفتے برطانیہ کی وزیر داخلہ سویلا بریورمین نے ایک مضمون شائع کرکے فلسطینیوں کے حق میں مظاہرہ کرنے والوں سے متعلق پولیس پر’دوہرا معیار’ اپنانے کا الزام لگایا تھا، جس پر برطانیہ کے اپوزیشن رہنماؤں نے کہا تھا کہ وزیر داخلہ نے فلسطینیوں کے حق میں سڑکوں پر آنے والے مظاہرین کو طاقت کے کچل دینے کی بات کرکے تشدد کو ہوا دینے کی کوشش کی ہے۔
وزیر داخلہ نے احکامات کے باوجود پولیس کی جانب سے فلسطین ریلی کے شرکا پر طاقت کا استعمال نہ کرنے پر ڈیپارٹمنٹ کو تنقید کا نشانہ بنایا تھا اور فلسطینیوں کو غزہ میں قتل و غارت گری کی وجہ قرار دیا تھا۔
بھارتی نژاد برطانوی وزیر داخلہ نے اسرائیلی فوج کی تعریف کرتے ہوئے کہا تھا کہ ان کے کئی رشتے دار اسرائیلی فوج میں ہیں اس لیے وہ جانتی ہیں کہ اسرائیلی فوج دنیا کی بہترین اور پیشہ ور فوج ہے۔
