اسموگ کے تدارک کے لیے دائر درخواستوں پر لاہور ہائیکورٹ میں سماعت کے دوران جسٹس شاہد کریم نے دفاتر میں ہفتے میں 2 روز ’ورک فروم ہوم‘ کی پالیسی پر عملدرآمد کی ہدایت کرتے ہوئے کہا ہے کہ اسکول اور کالجز ہفتے کو بھی بند رکھے جائیں۔
لاہور سمیت پنجاب میں بڑھتے ہوئے اسموگ کے حوالے سے ہارون فاروق سمیت دیگر شہریوں کی درخواستوں پر سماعت کرتے ہوئے جسٹس شاہد کریم نے ریمارکس دیے کہ کمشنر لاہور یہاں آکر بڑی باتیں کرتے ہیں مگر کام کچھ نہیں کیا، کمشنر لاہور اسموگ کنٹرول کرنے میں ناکام ہیں، ایک نوٹیفکیشن کے ذریعے سب کچھ بند کردیا جاتا ہے۔
ممبر جوڈیشل واٹر کمیشن نے عدالت کو بتایا کہ جھنگ ،حافظ آباد ،ننکانہ، خانیوال، بہاولنگر، اور شیخوپورہ میں فضا بہت آلودہ ہے، جسٹس شاہد کریم نے کہا کہ فصلوں کی باقیات جلانے کی جو ویڈیوز سامنے آرہی ہیں وہ افسوس ناک ہے، جھنگ ،حافظ آباد ،خانیوال ،ننکانہ ،بہاولنگر اور شیخوپورہ کے ڈپٹی کمشنرز کو فوری تبدیل کیا جائے۔
جسٹس شاہد کریم نے ریمارکس دیے کہ حکومت نے چھٹی کی سب افسر اور ذمہ دار چھٹیوں پر چلے گئے، اگر پانچ منٹ میں ٹریفک بند ہو تو پورے شہر میں نظام درم برہم ہوجاتا ہے، چیف سیکریٹری پنجاب ان افسروں کو تبدیل کرنے کا نوٹیفکیشن جاری کریں۔
لاہور ڈیولپمنٹ اتھارٹی کے وکیل نے عدالت کو بتایا کہ ایل ڈی اے نے صرف 70 روز میں انڈر پاس تعمیر کیا ہے، جس پر جسٹس شاہد کریم نے استہزائیہ انداز میں کہا کہ آپ تو انڈر پاس بنانے میں ماہر ہوگئے ہیں لیکن باقی چیزوں کو بھی دیکھیں، اس پر آپکو ستارہ امتیاز ملنا چاہیے اس تعمیر کے بعد جو اسموگ آئے گی وہ پوری سردیاں ہم بھگتیں گے۔
عدالت نے تمام اسکول اور کالجز کو ہفتے کے روز بند رکھنے کا حکم دیتے ہوئے کہا کہ دفاتر میں ہفتے میں دو روز گھر سے کام کرنے کی پالیسی پر عمل کیا جائے، عدالت نے چیف سیکریٹری پنجاب کی ممبر جوڈیشل واٹر کمیشن کے ساتھ میٹینگ منعقد کروانے کی بھی ہدایت کی۔
جسٹس شاہد کریم نے ممبر جوڈیشل واٹر کمیشن کو اپنی ملاقات میں چیف سیکریٹری پنجاب کو عدالتی احکامات کے بارے میں بھی آگاہ کرنے کی ہدایت کرتے ہوئے سماعت بدھ تک ملتوی کردی ہے۔
