پاکستان تحریک انصاف نے قومی اسمبلی میں اپوزیشن لیڈر کی تبدیلی سے متعلق اسپیکر راجا پرویز اشرف کو خط لکھتے ہوئے سابق وزیر خارجہ شاہ محمود قریشی کو اپوزیشن لیڈر نامزد کیا ہے۔
قومی اسمبلی میں پی ٹی آئی کے چیف وہپ عامر ڈوگر کی جانب سے اسپیکر قومی اسمبلی کو لکھے خط میں چیئرمین نیب کی تقرری پی ٹی آئی کے نامزد کردہ قائد حزب اختلاف سے مشاورت کے ساتھ کرنے کا مطالبہ کیا گیا ہے۔
تحریک انصاف کی جانب سے اسپیکر قومی اسمبلی کو شاہ محمود قریشی کی بطور قائد حزب اختلاف نامزدگی کے لیے لکھا خط اسپیکر آفس کو موصول ہوگیا ہے۔
پی ٹی آئی کے چیف وہپ عامر ڈوگر کی جانب سے لکھے گئے خط میں لاہور ہائیکورٹ کے 20 فروری کے فیصلے کا حوالہ دیا گیا ہے جس میں پی ٹی آئی کے ارکان قومی اسمبلی کے استعفوں کے نوٹیفکیشن کو کالعدم قرار دیا گیا ہے۔
خط میں اسپیکر قومی اسمبلی سے تحریک انصاف کے چیف وہپ عامر ڈوگر اسپیکر سے لاہور ہائیکورٹ کے فیصلہ کے باعث دعوٰی کیا ہے عدالتی حکم نامے کے بعد پی ٹی آئی قومی اسمبلی میں سب سے بڑی اپوزیشن جماعت ہے۔
عامر ڈوگر کے خط میں یہ بھی کہا گیا کہ قومی اسمبلی میں اپوزیشن لیڈر تحریک انصاف کا ہونا چاہیے، اس لیے قائد حزب اختلاف کی تبدیلی کا عمل فوری طور پر شروع کیا جائے۔
خط کے مطابق نیب قانون کے مطابق چیئرمین نیب کی تقرری قائد ایوان اور قائد حزب اختلاف کی مشاورت سے ہونی ہے۔ لہذا آفتاب سلطان کے استعفے کے بعد نئے چیئرمین نیب کی تقرری پر پی ٹی آئی کے نامزد کردہ اپوزیشن لیڈر مطلوبہ مشاورت کا عمل مکمل کیا جائے۔
پی ٹی آئی کے چیف وہپ عامر ڈوگر نے اپنے خط کے ساتھ عدالتی فیصلے کے بعد بحال ہونیوالے پی ٹی آئی کے اراکین اسمبلی کی فہرست بھی فراہم کی گئی ہے۔
