استحکام پاکستان پارٹی (آئی پی پی) کے سربراہ جہانگیر خان ترین نے کہا ہے کہ ہم اقتدار میں آ کر خوشحال اور ترقی یافتہ پاکستان بنائیں گے۔
کامونکی میں ورکرز کنونشن سے خطاب کرتے ہوئے جہانگیر ترین نے کہا کہ میں سوچ سمجھ کر ملک کی خاطر سیاست میں آیا اور عمران خان کا ساتھ یہ سمجھ کر دیا کہ یہ غیر روایتی سیاستدان ہے اور ملک کے لیے کچھ کرے گا مگر اس کا نتیجہ کوئی اور نکلا۔
مزید پڑھیں
انہوں نے کہاکہ اب ہم ماضی نہیں بلکہ آگے کی بات کریں گے، ہمیں پتا ہے کہ ملک کو کیسے ٹھیک کرنا ہے، استحکام پاکستان پارٹی اقتدار میں آ کر سرکاری اسکولوں اور اسپتالوں کو عالمی معیار کے مطابق بنائے گی اور باہر سے لوگ یہاں آئیں گے۔
جہانگیر ترین نے کہاکہ ملک کو ترقی یافتہ بنانے کے لیے معیشت کو اوپر اٹھانا ہو گا، ضروری ہے کہ ملک میں فیکٹریاں لگیں اور غریب کا چولہا جلے۔
انہوں نے کہاکہ ملک میں اتنی فیکٹریاں ہونی چاہییں کہ مزدور کی قدر بڑھے اور ہر فیکٹری والا کہے کہ میرے ساتھ آ کر کام کرو زیادہ تنخواہ دوں گا۔
کامونکی ورکرز کنونشن کا پنڈال آج گواہی دے رہا ہے کہ مستحکم پاکستان کا پیغام ہر گھر تک پہنچ چکا ہے. pic.twitter.com/jrwZtngD3l
— Istehkam-E-Pakistan Party (@istehkamPK) November 26, 2023
انہوں نے کہاکہ غریب کے مسائل حل کرنے تک پاکستان ترقی نہیں کر سکتا۔ ہم اقتدار میں آ کر محرومیوں کا خاتمہ کریں گے۔
جہانگیر ترین نے کہاکہ وطن عزیز پاکستان اسلام کے نام پر بنا۔ قائداعظم محمد علی جناح نے اس کے لیے جدوجہد کی، ہماری ذمہ داری ہے کہ اس کو ترقی یافتہ بنائیں۔
الیکشن جیت کر ملک میں روزگار کے مواقع پیدا کریں گے، عبدالعلیم خان
استحکام پاکستان پارٹی (آئی پی پی) کے صدر عبدالعلیم خان نے ورکرز کنونشن سے خطاب کرتے ہوئے کہا کہ آئندہ عام انتخابات کے بعد اقتدار میں آ کر روزگار دیں گے۔
انہوں نے کہاکہ ماضی میں حکمرانوں نے ملک کو لوٹا ہے، عوام نے ساتھ دیا تو ہم سب سے پہلے غریب کو مفت بجلی دیں گے، 300 یونٹ تک بجلی فری ہو گی۔
انہوں نے کہاکہ عثمان بزدار نے 3 برس میں پنجاب کا بیڑا غرق کیا، پاکستان میں سب کچھ ہے لیکن ایماندار لیڈر نہیں۔
عبدالعلیم خان نے کہاکہ کسانوں کے ٹیوب ویل کا کوئی بل نہیں آئے گا، اس کے علاوہ موٹرسائیکل والوں کو آدھی قیمت پر پیٹرول دیا جائے گا جبکہ مزدور کی کم از کم اجرت 50 ہزار کی جائے گی۔
انہوں نے کہاکہ ہم اقتدار میں آ کر نوجوانوں کو بلاسود قرضے دیں گے تاکہ روزگار کے مواقع پیدا ہوں اور ملک آگے بڑھے، نوجوانوں کو پیروں پر کھڑا کرنے کے بغیر پاکستان ترقی نہیں کر سکتا۔
عبدالعلیم خان نے کہاکہ استحکام پاکستان پارٹی الیکشن جیت کر کچی آبادی کے مکینوں کو مالکانہ حقوق دے گی۔
