گزشتہ روز سماجی رابطے کے پلیٹ فارم ’ایکس پر ایک ٹویٹ کی گئی جس میں خبر دی گئی کہ فنڈز کی کمی کے باعث اسلام آباد وائلڈ لائف مینیجمنٹ بورڈ کی جانب سے مارگلہ ہلز نیشنل پارک کے محفوظ علاقے میں سیروتفریح کے لیے افراد اور اداروں پر فیس عائد کر کے آمدنی حاصل کرنے کا فیصلہ کیا گیا ہے۔
جس کے بعد لوگوں میں یہ تشویش کی لہر دوڑ گئی۔ اس کے بعد بڑی تعداد میں لوگوں نے سوال کیا کہ واقعی یہ درست ہے کہ اسلام آباد کی مارگلہ پہاڑیوں میں ہائیکنگ اور ٹریکنگ ٹورز اب مفت نہں رہیں گے؟ اگر ’ہاں‘ تو ان سرگرمیوں کے لیے کتنی فیس لی جائے گی؟
فنڈز کی کمی کا سامنا کرتے ہوئے، اسلام آباد وائلڈ لائف مینجمنٹ بورڈ (IWMB) نے مارگلہ ہلز نیشنل پارک (MHNP) کے محفوظ علاقے میں سرگرمیوں کے لیے افراد اور اداروں پر فیس عائد کرکے آمدنی حاصل کرنے کا فیصلہ کیا ہے۔ pic.twitter.com/CXBjJKPlYE
— Islamabad Updates (@IslamabadViews) November 28, 2023
وی نیوز نے جب اس بابت وائلڈ لائف مینیجمنٹ سے رابطہ کیا تو ان کے ترجمان عمر بلال کا کہنا تھا کہ یہ پوری خبر اس انداز میں درست نہیں ہے کہ فیصلہ کر لیا گیا ہے۔ ابھی تک کوئی حتمی فیصلہ نہیں کیا گیا، تاہم اس حوالے سے مشاورت ہو رہی ہے کہ مارگلہ کی پہاڑیوں میں ہائیکنگ اور ٹریکنگ ٹور کے لیے جانے والے افراد اور اداروں سے فیس لی جائے۔
مزید پڑھیں
اس حوالے سے گزشتہ روز بورڈ کی میٹنگ بھی ہوئی لیکن فیصلے کو اتفاق رائے سے موخر کر دیا گیا ہے۔ جب تک اس کا فیصلہ نہیں ہو جاتا، اس وقت تک وہاں جانے والے کسی بھی شخص سے کسی قسم کی کوئی فیس نہیں لی جائے گی۔
