پی ٹی آئی کور کمیٹی کا اجلاس، انٹرا پارٹی الیکشن کی تیاریوں سے متعلق مفصل بریفنگ

پاکستان تحریک انصاف کی کورکمیٹی کے خصوصی اجلاس میں انٹرا پارٹی الیکشن کی تیاریوں کے حوالے سے مفصل بریفنگ دی گئی۔

اس موقع پر کورکمیٹی کی جانب سے انٹراپارٹی انتخابات کی تیاریوں پر اطمینان کا اظہار کیا گیا۔ جب کہ چیئرمین تحریک انصاف عمران خان کی جانب سے بطور عبوری چیئرمین نامزدگی پر بیرسٹر گوہر علی خان کو مبارکباد دی گئی۔

انٹراپارٹی انتخابات میں کامیابی اور بعد ازاں بانی چیئرمین عمران خان کے ویژن کی روشنی میں جماعتی امور کی انجام دہی کے حوالے سے بیرسٹر گوہر علی خان کے لیے نیک خواہشات کا اظہار کیا۔

اجلاس میں کہا گیا کہ بیرسٹر گوہر علی خان کی نامزدگی جماعت کی صفوں میں تقسیم و انتشار کا تاثر قائم کرنے کی سوچی سمجھی کاوشوں پر کاری ضرب ہے۔

کورکمیٹی کا کہنا تھا کہ بانی چیئرمین عمران خان کے اس فیصلے سے موروثی سیاست کے خاتمے اور پارٹی کو ادارہ بنانے کے ویژن کی تائید و توثیق ہوئی ہے۔ نہایت غیرمعمولی حالات میں نہایت اہم منصب پر جماعت کے ایک محنتی، وفاشعار اور قابل کارکن کی نامزدگی بانی چیئرمین کے جماعت کے حوالے سے ویژن کی بےمثال عملی نظیر ہے۔

علاوہ ازیں اجلاس میں نیاز اللہ نیازی کی بطور چیف الیکشن کمشنر پاکستان تحریک انصاف تعیناتی پر مبارکباد دی گئی۔

کورکمیٹی کا کہنا تھا کہ پی ٹی آئی مکمل اتحاد و یگانگت سے اپنے حقیقی اہداف کی جانب بڑھے گی اور بانی چیئرمین عمران خان کی قیادت میں قومی انتخابات میں بے مثال کامیابی کے ذریعے آئین کی بالادستی، قانون کی حکمرانی اور ملک کی حقیقی آزادی کی تاریخی جدوجہد کو منزل سے ہمکنار کرے گی۔