چین کی جانب سے پاکستان کو دیے گئے 25 لائٹننگ ڈیٹیکٹرز ملک کے مختلف علاقوں میں نصب کر دیے گئے ہیں، ان ڈیٹیکٹرز کا بنیادی مقصد آسمانی بجلی کے خطرات کو چانچنے میں مدد لینا ہے۔
محکمہ موسمیات میں سیسمولوجی ڈویژن کے ڈائریکٹر زاہد رفیع نے ذرائع ابلاغ سے گفتگو کرتے ہوئے کہا کہ چین نے پاکستان کو 10 لاکھ ڈالر مالیت کے 25 ویدر ڈیٹیکٹرز فراہم کردیے ہیں تاکہ انتہائی کم فریکوئنسی (وی ایل ایف، وی ایف) لائٹننگ نیٹ ورک قائم کیا جاسکے۔
زاہد رفیع کے مطابق منصوبے کا بنیادی مقصد محکمہ موسمیات(پی ایم ڈی)کی آسمانی بجلی کے خطرات کو چانچنے کی صلاحیتوں میں اضافہ کرنا اور آسمانی بجلی گرنے سے جان و مال دونوں پر پڑنے والے اثرات کو کم کرنا ہے۔
انہوں نے کہا کہ یہ ڈیٹیکٹر پاکستان کے مختلف علاقوں میں نصب کر دیے گئے ہیں جہاں آسمانی بجلی گرنے سے جان و مال کو خطرہ لاحق ہے۔
انہوں نے کہا کہ چین کی جانب سے یہ تعاون ایک قیمتی تحفہ ہے جسے پاکستان پہلی بار استعمال کرے گا۔ یہ تعاون پاک چین شراکت داری کی اہمیت کو اجاگر کرتا ہے۔
رپورٹ کے مطابق ڈیٹیکٹرز کے حوالے سے ستمبر 2023 میں بیجنگ میں پی ایم ڈی اور چائنیز اکیڈمی آف سائنسز(آئی ای ای سی اے ایس ) کے انسٹی ٹیوٹ آف الیکٹریکل انجینئرنگ کے درمیان مفاہمت کی یادداشت پر دستخط کیے گئے تھے۔
ڈائریکٹر جنرل پی ایم ڈی صاحبزادہ خان کی سربراہی میں چار رکنی وفد نے آئی ای ای سی اے ایس کے ڈائریکٹر ڈاکٹر یاہوا لی کے ساتھ پاکستان میں وی ایل ایف، ایل ایف لائٹنگ کا سراغ لگانے والے نیٹ ورک کے قیام کو شروع کرنے اور فروغ دینے کے لیے تفصیلی تبادلہ خیال کیا۔ زاہد رفیع نے کہا کہ یہ ایم او یو پر عمل درآمد کا پہلا مرحلہ ہے۔
