لاہور ہائیکورٹ نے اسموگ کے تدارک کے لیے دائر درخواستوں پر سماعت کے دوران احکامات کی خلاف ورزی کرنے والے جوہر ٹاؤن کے کیفے کو فوری سیل کرنے کا ہدایت کرتے ہوئے خلاف وزری کرنے والے ریسٹورنٹس کو 50، 50 ہزار روپے جرمانہ ادا کرنے کا بھی حکم دیا۔
لاہور ہائیکورٹ کے جسٹس شاہد کریم نے اسموگ کے تدارک کے لیے دائر درخواستوں پر سماعت کی۔ عدالت نے اسموگ پالیسی کی خلاف وزری کرنے والے ریسٹورنٹس کو 50، 50 ہزار روپے جرمانہ کرنے کا حکم دیا، اور ہدایت کی کہ بغیر اجازت کیفوں کے خلاف فوری کارروائی کی جائے۔
مزید پڑھیں
دوسری جانب وکیل ایل ڈی اے عدالت میں پیش ہوئے اور موقف اختیار کیا کہ لاہور کے انڈر پاسز کی تزئین و آرائش کی تعمیر 25 دسمبر تک مکمل ہوگی، جس پر جسٹس شاہد کریم نے کہا کہ اس کو جلدی مکمل کریں 25 دسمبر بہت دور ہے۔ 9 انڈر پاسز کی تعمیر کے باعث ٹریفک جام رہتی ہے۔
عدالت نے ہدایت کی کہ پیر تک آپ مشاورت کرکے عدالت کو بتائیں کب تک انڈر پاسز کی تعمیر مکمل ہوسکتی ہے۔ اگر میں دن میں بھی انڈر پاسز کی تزئین و آرائش کرنے کی اجازت دیتا ہوں تو پھر کتنے دن لگیں گے۔ اس پر مشاورت کریں اور انڈر پاسز کی تزئین و آرائش جلد مکمل کرنے کی حتمی تاریخ دیں۔
عدلت نے برہمی کا اظہار کرتے ہوئے کہا کہ کیا سی بی ڈی نے کوئی ایک گرین پروجیکٹ شروع کیا ہے۔ یہ بلند وبالا عمارتیں کھڑی کررہے ہیں مگر گرین پروجیکٹ کوئی شروع نہیں کیا۔
جوڈیشل واٹر کمیشن نے عدالت کو آگاہ کیا کہ جب پہلی میٹینگ سی بی ڈی سے ہوئی تھی تو انہوں نے کہا تھا کہ گرین پروجیکٹ شروع کریں گے۔ عدالت نے گرین پروجیکٹ سے متعلق سی بی ڈی سے آئندہ سماعت پر رپورٹ طلب کرلی۔
جسٹس شاہد کریم نے شہری ہارون فاروق سمیت دیگر کی درخواستوں پر سماعت کی جس کے بعد عدالت نے سماعت پیر 11 دسمبر تک ملتوی کردی۔
