ڈپٹی سیکریٹری جنرل مسلم لیگ ن عطاءاللہ تارڑ کا کہنا ہے کہ ان کی جماعت نے بروقت الیکشن کی حکمت عملی مرتب کرلی ہے، عام انتخابات الیکشن 8 فروری 2024 کو ہی ہوں گے۔
لاہور ہائیکورٹ میں میڈیا سے گفتگو کرتے ہوئے لیگی رہنما عطاء اللہ تارڑ کا کہنا تھا کہ عام انتخابات الیکشن 8 فروری 2024 کو ہی ہوں گے، الیکشن میں تاخیر نہیں ہوگی سپریم کورٹ کا متفقہ فیصلہ ہے۔
عطاءاللہ تارڑ کے مطابق مسلم لیگ ن کو وفاق اور صوبوں میں اکثریت لینے میں کوئی مشکل نہیں آئے گی کیونکہ لیگی قیادت نے سندھ اور بلوچستان کے دورے کرکے سیاسی جماعتوں سے اتحاد کیا۔
لیگی رہنما کا کہنا تھا کہ سابق چیئرمین پی ٹی آئی نے قومی خزانے پر ڈاکا مارا، القادر ٹرسٹ قومی خزانے پر سب سے بڑا ڈاکا ہے، اس کیس میں سابق چیئرمین پی ٹی آئی کو سزا سے بچانا مشکل ہے۔
عطاء اللہ تارڑ کا کہنا تھا کہ بلاول بھٹو ہمارے لیے قابل احترام ہیں، خواہشات رکھنے پر کوئی پابندی نہیں ہے، لیکن پیپلز پارٹی کے پاس پنجاب کے ہر حلقے میں امیدوار نہیں ہیں۔
