اسلام آباد ہائیکورٹ نے پولیس کو حکم دیا ہے کہ وہ 19 دسمبر تک پاکستان تحریک انصاف کے رہنما اور سابق ایم پی اے چوہدری محمد ارشد کو بازیاب کرائے۔
گجرات سے پی ٹی آئی کے سابق ایم پی اے چوہدری محمد ارشد کی بازیابی کے لیے انکی بہن رشید بیگم نے اسلام آباد ہائیکورٹ میں درخواست دائر کی تھی۔ اسلام آباد ہائیکورٹ کے جسٹس ارباب محمد طاہر نے کیس کی سماعت کی۔
عدالتی حکم پر ایس ایس پی آپریشنز، متعلقہ ایس پی اور ایس ایچ او تھانہ مارگلہ ہائیکورٹ میں پیش ہوئے۔ ایس ایس پی آپریشنز نے عدالت کو بتایا کہ لاپتہ سابق ایم پی اے اسلام آباد پولیس کی تحویل میں نہیں، گاڑیوں کے ریکارڈ کے مطابق گاڑیاں شہر سے باہر نکل چکی ہیں۔
عدالت نے پولیس کو لاپتہ چوہدری محمد ارشد کو بازیاب کرانے کے لیے 19 دسمبر تک مہلت دیتے ہوئے سماعت ملتوی کردی۔
واضح رہے کہ رشید بیگم نے اپنی درخواست میں کہا تھا کہ ان کا بھائی چوہدری ارشد 3 بار پنجاب اسمبلی کا رکن رہ چکا ہے، 4 دسمبر کو سابق ایم پی اے چوہدری ارشد کو ایف ایٹ تھری اسلام آباد سے پولیس نے اٹھایا اور نامعلوم مقام پر منتقل کیا، اس حوالے سے پولیس کی گاڑیوں کی فوٹیج بھی موجود ہے۔