انسانی اسمگلنگ میں ملوث ملزم حمزہ سہیل کراچی سے گرفتار

ڈائریکٹر کراچی زون ضعیم اقبال شیخ کی ہدایت پر انسانی سمگلرز کی گرفتاری کے لیے کریک ڈاون جاری ہے۔ ڈپٹی ڈائریکٹر اینٹی ہیومن ٹریفکنگ سرکل کراچی بہاول اوستو کے احکامات پر چھاپہ مار ٹیم نے کارروائی کرتے ہوئے انسانی سمگلنگ کے گھناونے جرم میں ملوث انسانی اسمگلر حمزہ سہیل کو کراچی کے علاقے بہادر آباد سے گرفتار کر لیا ہے۔

ترجمان ایف آئی اے کے مطابق ملزم بغیر لائسنس کے عجوہ ٹریول کے نام سے ایجنسی چلا رہا تھا۔ ملزمان کا گروہ سادہ لوح شہریوں کو ملازمت کا جھانسہ دے کر بھاری رقوم وصول کر رہا تھا۔ ابتدائی تفتیش کے مطابق ملزم نے متعدد شہریوں سے بیرون ممالک بھجوانے کے نام پر پاسپورٹ وصول کیے۔

ترجمان کا کہنا ہے کہ چھاپے کے دوران ملزم کے قبضے سے 13 عدد پاسپورٹس، 12 چیک بکس، لیپ ٹاپس اور دیگر دستاویزات برآمد کیے گئے ہیں۔ ملزم لائسنس کے حوالے سے بھی حکام کو مطمئن نہیں کرسکا۔ ملزم کے خلاف کارروائی خفیہ اطلاع پر عمل میں لائی گئی۔

ترجمان ایف آئی اے کے مطابق ملزم کو گرفتار کرکے تفتیش کا آغاز کر دیا گیا ہے۔ دیگر ملزمان کی گرفتاری کے لیے چھاپے مارے جا رہے ہیں۔