کاؤنٹر ٹیرارزم ڈیپارٹمنٹ (سی ٹی ڈی) اسلام آباد کے افسروں اور اہلکاروں کا نفسیاتی سروے کیا گیا ہے جس کی رپورٹ آ گئی ہے۔
ترجمان اسلام آباد پولیس نے بتایا ہے کہ آئی سی سی پی او ڈاکٹر اکبر ناصر خاں کے احکامات پر سی ٹی ڈی اہلکاروں کا نفسیاتی سروے کیا گیا۔ جس کے مطابق 37 اہلکار متاثر پائے گئے۔
ترجمان کے مطابق 489 افسروں و اہلکاروں کا نفسیاتی سروے کیا گیا جو ایک ماہ میں مکمل ہوا۔
سروے کے مطابق سی ٹی ڈی کے 33 اہلکار ڈپریشن کا شکار پائے گئے جبکہ 4 اہلکاروں کو کونسلنگ کی ضرورت ہے۔
ترجمان نے بتایا کہ سی ٹی ڈی اہلکاروں کے نفسیاتی حالات جاننے کے لیے تحریری امتحان بین الاقوامی معیار کے مطابق ڈیزائن کیا گیا۔ جس کے بعد ذہنی دباؤ کے شکار اہلکاروں کے فوری علاج کی سہولتیں مہیا کرنے کی ہدایت کردی گئی۔
ترجمان نے بتایا کہ رپورٹ آنے کے بعد متاثرہ اہلکاروں کو آسان ڈیوٹیوں پر تعینات کردیا گیا ہے جبکہ 2 مریضوں کو اسپتال منتقل کردیا گیا۔ ’پولیس اہلکاروں کی فلاح و بہبود ہماری اولین ترجیح ہے‘۔
