وفاقی تحقیقاتی ایجنسی (ایف آئی اے) نے شہریوں کو بیرون ملک اسمگل کرنے والے گینگ کے کارندوں کو گرفتار کرلیا ہے۔
ترجمان ایف آئی اے کے مطابق ایف آئی اے انسداد انسانی اسمگلنگ نے ڈائریکٹر کراچی زون ضعیم اقبال شیخ اور ڈپٹی ڈائریکٹر اینٹی ہیومن ٹریفکنگ سرکل بہاول اوستو کے احکامات پر انسانی سمگلرز کی گرفتاری کے لئے کریک ڈاون کیا۔
ایف آئی اے کی چھاپہ مار ٹیم نے بدنام زمانہ 2 انسانی اسمگلروں کو گرفتار کر لیا، گرفتار ملزمان انسانی اسمگلنگ کے گھناؤنے جرم میں ملوث منظم گینگ کے کارندے ہیں۔
مزید پڑھیں
ایف آئی اے کے مطابق ملزمان بھاری رقوم کے عوض سادہ لوح شہریوں کو موزمبیق کے جعلی ویزے فراہم کرتے تھے، ملزمان متاثرین کو موزبیق سے دیگر افریقن ممالک سمگلنگ میں بھی ملوث تھے، گرفتار ملزمان میں سہیل اسلام اور محمد عارف شامل ہیں، جن کو کراچی کے علاقے ناظم آباد سے گرفتار کیا گیا۔
دوران تفتیش ملزمان نے اپنے جرم کا اعتراف کیا ہے کہ متعدد شہریوں کو جنوبی افریقہ اور دیگر افریقی ممالک میں غیر قانونی داخلے کے لیے سہولت فراہم کی۔
گرفتار ملزمان غیر قانونی بارڈر پار کروانے میں ملوث بین الاقوامی گینگ کے ساتھ رابطے میں تھے، ملزمان نے غیر قانونی بارڈر پار کروانے کے عوض متاثرین سے بھاری رقوم وصول کیں ہیں۔
ملزمان کے خلاف اینٹی ہیومن ٹریفکنگ سرکل کراچی میں مقدمہ درج تھا،ملزمان کو گرفتار کر کے مزید تفتیش کا آغاز کر دیا گیا ہے اور دیگر ملزمان کی گرفتاری کے لئے چھاپے مارے جا رہے ہیں۔
